Proiektuak
Badiharduguk hainbat ekintza eta lan gauzatu ditu bere sorreratik: hitzaldiak; mahai-inguruak; aholkularitza elkarte eta udalei; euskalkien inguruko ikerketak; liburugintza (Deba Ibarretik euskararen herrira, 2002; Berbeta Berua, 2003; Ahozko jarduna hobetzeko proposamenak, 2005); bilketa bibliografikoa; Durangoko liburu azokan presentzia du urtero (bailara osoko liburuekin); eta abar.
Une honetan martxan ditugun proiektuak eta lan-esparruak hauexek dira:
- Deba Eskualdeko Ahotsak:
Bailarako herrietako hizkerak eta ahozko ondarea jasotzea eta hedatzea da. Euskalkia eta Etnografia. Grabazio dialektologiko eta etnografiko zaharrak batu, grabazio berriak egin, eta horiek guztiak hedatzea. - Ahozko artxiboa
Eskualde osoko herri-hizkeren ahozko artxiboa antolatzen dihardugu, eta artxibo hori on-line kontsultatzeko moduan egongo da laster. Deba Ibarreko herri guztietako hizkeren doinuak entzun ahal izango ditugu. - Liburugintza:
Honezkero hiru liburu argitaratu ditu Badiharduguk, eta laugarrena ere bidean da, Koldo Zuazok prestatzen diharduen Deba Ibarreko euskeria lanaren edizio berria. - Deba ibarreko aditz-taulen bilduma
Eskualdeko herri bakoitzeko adizkiak jaso, tauletan antolatu eta kaleratzea da helburua, ondoren ikastetxe eta euskaltegietan banatzeko. - Euskalkien Liburutegia Euskalkian edo euskalkien inguruan idatzitako liburuen, lanen eta ikerketen datu-basea: idazlea, urtea, gaia, eta abar.
- Euskalkia lantzeko karta-jokoa
Hitzekin jolastuz/jokatuz, euskalkia lantzeko aukera emango duen karta-sorta bat sortu eta karta-joko desberdinak asmatuko dira. - Durangoko Azoka:
Badihardugu Euskara Elkarteak mahaia jartzen du urtero Durangoko Liburu Azokan, eta eskualdean kaleratutako euskal liburu guztiak eramaten ditu, udalekin eta elkarteekin elkarlanean. - Berbeta Berua eta gazteak
Gazteen arteko hizkera, lagunarteko berbeta. Euskarak duen gaitzik nagusietakoa nola osatu? - Status-aren lantaldea
Lantalde honek ere, euskararen eta euskalkiaren statusaren inguruan hainbat asmo ditu martxan. - Teknologia Berriak
Internet eta Teknologia berriak euskararen alde ekiteko.