Natura eta kirola
Harkaitzak eta amildegi sakonak
Oñati nortasun historiko handiko lurra da eta monumentu gogoangarriak daude bertan, baina baliorik handienetakoa naturan du. Hareharria eta kareharria ditu nagusi eta harri horiek mota askotako paisaiak eskaintzen dizkigute: kobak, leizeak, torkak, lapiazeak... Lurpeko gunerik garrantzitsuenetako batzuk ere Oñatiko lurretan daude, Gesaltza-Arrikrutz, esaterako; sakonera eta luzera harrigarriko gune hori paradisu hutsa da. Zulo horietako batzuetan gizakia bizi izan da aspaldidanik eta sinesmen ugariren sorburu ere izan dira. Saroiek, belardiek, pagadiek, kareharrizko hormek, haitzebakiek eta gailurrek edertasun paregabeko sinfonia osatzen dute; sai arreek zaintzen dute dena zeru goian biraka dabiltzala eta hamaika aldiz igaro dira inguru horietatik ardiak eta zaldiak. Inguru horiek ezagutzeko onena proposatutako ibilbide hauek egitea da.
Oñati, Gipuzkoa, Euskadi
Aizkorriko natur parkea
Natur parke hori da Gipuzkoako naturgune harrigarrietako bat da. Parke horretako talaia da Gipuzkoako gailurrik altuena. Mendigunea hainbat mendilerroz osatuta dago eta mendilerrorik altueneko gailurrik esanguratsuenaren izena du: Aizkorri. Harkaitzezko tontor horren puntan Santo Kristoren ermita dago. Flandria eta Gaztela lotzen zituen Erdi Aroko galtzada zaharra mendilerroaren hegoaldetik igarotzen da, eta Gipuzkoako igarobiderik ospetsuenetakoa dago bertan: San Adriango tunela. Urbiako zelaiak dira Natur Parkeko muina; zelai horiek historiaurretik dira ezagunak haran horretako ordokietan sakabanatuta dauden dolmenek adierazten dutenez. Zuhaitzik gehienak pagoak dira, eta hemen dago Gipuzkoako basorik garrantzitsuenetakoa.
Arrikrutz kobetako proiektu turistikoa
Oñati inguruko paisaian interes eta kalitate handiko elementuak daude. Arantzazuko Santutegitik gertu eta Aizkorriko mendilerroaren azpian du Oñatiko Udalak natur eskaintza berezi bat sortzeko eta abian jartzeko asmoa, Oñati-Arrikrutzeko karst inguruan hain zuzen. Abian jarrita dagoen arren, oraindik amaitu gabeko proiektu honen helburua da Oñatiko natur, gizarte eta kultur inguruaren balioa handitzea. Sistema informatiko aurreratu baten bidez barne gidaketak egin ahal izango dira eta barruko elementu arkeologikoei, etnografikoei eta espeleologikoei balioa emango zaie.