Urriaren 3an hasiko dute 44 bertsolarik Txapelketa Nagusia
Urriaren 3an hasi eta abenduaren 13ra arte luzatuko da Bertsolari Txapelketa Nagusia. Bertsoz betetako udazkena izango da. Guztira, 44 bertsolari, 10 epaile eta 10 gai-jartzailerekin batera milaka bertsozale ere protagonista izango dira.

Txapelketa Nagusiari buruzko informazioa www.txapelketanagusia.eu atarian duzue.

Saioetarako sarrerak internetez eskuratu ditzakezua: www.bertsosarrerak.eu atarian.

Mintzola Fundazioak administratzailea behar du
Mintzola Fundazioak administratzailea kontratatzeko hautapen prozesua zabaldu du.
Mintzola Fundazioa 2008an sortua da, eta bost erakundek osatzen dute Patronatua: Gipuzkoako Foru Aldundiak, Villabonako Udalak, Euskal Herriko Bertsozale Elkarteak, Euskal Herriko Unibertsitateak eta Gipuzkoako Kutxak. Helburuak ditu, alde batetik, euskararen ahozko tradizioaren behatoki dinamikoa izatea, eta bestetik, gizarteak ahozko komunikazioaren esparruan dituen premiei erantzun egokia ematea.

Hautapen prozesuan partaide izateko, Curriculum Vitae-a (CV) bidali behar dute hautagaiek, 2009ko urriaren 2a baino lehenago, baloratuko diren esparruen azalpen zehatza eginez, ondorengo helbidera: mintzola@mintzola.com / Mintzola Fundazioa, Subijana Etxea. Kale Nagusia 70, 20150 VILLABONA (Gipuzkoa).

"Bertsolaritza eta Kazetaritza" mintegia Bertsozale Elkartearen eskutik
Bertsolaritzaz komunikabideetan jardun nahi duten kazetariei bertsolarien jarduna aztertzeko baliabideak ematea eta sakondu nahi duten gainontzekoei bertsolaritzara hurbiltzea da mintegiaren helburua.

Goizeko jardun bi izango dira, irailaren 24an eta 25ean, 10:00etatik 13:30etara.
Irakasleak Karlos Aizpurua eta Arkaitz Goikoetxea izango dira.

Bertsozale Elkartearen egoitza nagusian izango da, Villabonako Mintzola ahozko lantegian. (Kale Nagusia 70, Villabona, Gipuzkoa)

Izena irailaren 18a bitartean eman daiteke info@txapelketanagusia.eu helbide elektronikora mezu bat igorriz.

Euskaldun berrientzako bertso eskola
Bigarren urtez, Iruñeko Hizkuntza Eskola Ofizialak ekimen interesgarria jarri du martxan. Euskara ikasten ari diren ikasleei bertsogintzan lehen urratsak emateko aukera ematen die Eskolak, propio horretarako antolatutako tailerraren bitartez. Urrian hasiko den ikasturteari begira, bi maila eskaini dituzte, bata bertso saio baten nondik norakoa ulertzeko; eta bestea, bertsotan hasteko. Aurrematrikulazioa irailaren 9 arte egiten ahal da, 629301313 telefonoan.