Deskribapena
Euskal Autonomia Erkidegoko tontor altuenak Aizkorrin daude: 1.551 metroko Aitzuri eta 1.528ko Aizkorri mendia dira, alegia. Gipuzkoako hegoaldeari zein oso bestelakoa den Arabako Lautadako paisaiari so egiteko toki aparta da mendilerro ikusgarria.
Gipuzkoaren hegoaldeko muga finkatzen duen kareharrizko horma horretako haitzen artean dituzte sorburuak Oria, Urola eta Deba Gipuzkoako hiru ibai nagusiek. Horma natural sendoa izan arren, antzinatik zeharkatu du, ordea, gizakiak. Argi ikusten da hori monumentu megalitiko ugarietan eta San Adrian tunelean. "Sandratei" izenaz ere ezaguna den tunela Santiagorako bidean Gipuzkoatik Arabara igarotzen ziren erromesek zulatu zuten harrian. Eremu natural zoragarri horretan, Arantzazuko santutegia ere gizakiaren esku-hartzearen erakusgarri bikaina da.
Flora eta Fauna
Aizkorriko faunaren ordezkaritzat har daitezke belatz handia, sai arrea, katamotza eta gailurretako uhandrea. Ez oso urrun, ardi latxak ikus daitezke larrean bazkatzen. Florari dagokionez, harizti eta pagadiekin batera mendietako espezie interesgarriak ere badaude Aizkorrin.
Sarbidea
Oñatitik abiatuz gero, Arantzazurako bidea hartuta. Zegamatik ere hel daiteke, Otzaurteko gainean barrena. Aretxabaletako Urkulu urtegian beste sarbide bat du. N-1etik ere, Idiazabalgo Irteeratik, Segurarantz eta ondoren Zegamarantz doan GI-2637 bidea hartuko dugu.
Azalera
14.626 hektarea