Deskribapena
Sagardo-dolareak, gari-makinak, pieza handiak nahiz txikiak, zaharrak nahiz oraindik erabiltzekoak, Larraulgo Museoak nekazal munduaren eguneroko bizimodua eman nahi du ezagutzera.
Larraul 150 bizilaguneko herria da, Ernioren magalean, mendetan aldaketarik apenas ezagutu zuen baserrien bilgunea izan da. Museoak orduko bizimodua eta gaur egungo bilakaera ezagutzeko parada eskaintzen digu.
Museo honetako pieza gehienen erreferentziak nekazal mundukoak dira: laia eta goldeak, gurdi eta lanabesak, gari-makina, sagardo-dolarea, lapikoak, kutxak. Baina baita josteko makina bat, telefono bat, argizaiolak, liburuak, erretratu zaharrak edota balantzak ere erakusten dira, erlijioaz, merkataritzaz, kirolaz, gerraz, festaz, emigrazioaz mintzatzen zaizkigunak.