Hemen zaude: Hasiera Albisteak Euskara munduko azken mugaraino heldu zen: Argentinako Patagoniako Euskararen Eguneko argazki kronika

Euskara munduko azken mugaraino heldu zen: Argentinako Patagoniako Euskararen Eguneko argazki kronika

Atzo Rio Gallegoseko Euskal Etxearen Euskararen Eguneko jaiaren kontakizun laburñoa ekarri genuen gure orrietara eta gaur, ziztu bizian, elkarteko kideek ekitaldiko argazki sorta helarazi digute. Milesker Patagoniako lagunei euren erantzun bizkorragatik eta munduko alde eder horretan ere irakurtzen gaituzten euskaldunak daudela gogorarazteagatik. Horrelakoek Diaspora gero eta gertuago dugula/gaudela sentiaratzen digute eta munduko euskaldunei euren argazki, istorio, zorion agur eta artikuluen iruzkinak bidaltzeko gonbitea berresten diegu. Jarraien Patagoniako Euskararen Eguna, Hegoalde Argentinarreko kideek kontatuta.

Río Gallegos, Argentina. "Eta eguna heldu zen. Euskararen Eguna, Santa Cruz-eko Hegoalde Argentinarra Euskal Etxeak Río Gallegos-en abenduaren 5ean egin zuen jaiarekin ospatu zuena; eta bertan, azkenik, jakin genuen nork irabazi zuen Euskal Herrirako bi lagunentzako bidaia, mila euro eta Aberria bisitatu nahi dugun guztion inbidia.

Suspensea bukaera arte gorde zuten, baina zozketan pentsatzeko astirik apenas izan zuten Río Gallegoseko 15. Eskolan bildu ziren ia 200 lagunek: batzuk bazkari goxoa dastatzen, besteak aurreko egunetik dena antolatzeko lanaz arduratzen, eta denak musikaz eta 'artisten' emanaldiaz gozaten.

Astiro-astiro prestaturiko babarrun gorriak izan ziren Rober Arizmendik, Domingo Urbietak eta Luís Landaburuk prestatu zuten menuaren izarrak. Aurretik elkarteko kideek ekarritako errezetekin Claudia Labourten zuzendaritzan prestatu zuten pintxo sorta zabala (Rudy Villalbak eta Martín Rojas Chorroarinek sorturiko haragidun pasta pintxoak, kasu). Oso goxoa dena, Torres doktorearen arroz-esnearekin bazkaria biribildu zuten lagunen iritziz.

Euskararen Eguna 2008 (3)Jaia Alejandra Urbietaren deiarekin hasi zen. Hala sartu zen Domingo Urbieta Ikurrinarekin aretoan (Domingo XV. mendean Frantziako erregea gudalekuan preso hartu zuen Juan de Urbieta kapitainaren ondorengoa da Dopmingo), bertan bildu ziren euskaldun guztien artean emozio eta zirrara bizia sortuz. [Ezkerreko irudian, Domingo Urbieta bazkidea ikurrinarekin aretoan sartu zeneko unea izan zen eguneko zirraragarrienetakoa (argazkia Hegoalde ArgentinarraEE)]

Zerbitzari lanetan laguntzen aritu ziren gazteek --Matías Parabele Goyheneix, Marcos Cortés Urbieta, Mauro Martelin, Darko eta Yako Radosaldovic, María Victoria Arizmendi, Andrés Marucco García, Santiago eta Juanito Torres Murua, Agustina Borrás eta Tomás Clark-- guztien esker ona jaso zuten.

Euskararen Eguna 2008 (5)

[Gazteek ere lan eskerga egin zuten bazkaria prestatzen eta mahaiak zerbitzatzen. Iruditan Matias Parabele, Mauro Martilen eta Agustina Borras (argazkia Hegoalde Argentinarra EE)]

Eta jada jaian buru-belarri sartuta, euskal etxeko irakasleek, Fernando Zurutuzak eta Susana Moyanok txikien dantza taldearen lehen emanaldia eta debuta gidatu zuten. Euren ahalegina eta gogoa sarituz, Olentzerok opariak eman zizkien. Mario Berois izan zen Olentzero, ederki mozorrotuta nahiz eta Patagoniako udaren beroak sufritu.

 Euskararen Eguna 2008 (4)

[Sukaldaria, Olentzero eta Arizmendi, argazkitan azaltzeko prest (argazkia Hegoalde ArgentinarraEE)]

 

Beste une hunkigarri bat euskara lantegiaren kargu izan den Mero Echandik “Nire aitaren etxea” poema irakurri zuenean etorri zen. Ondoren, gainera, bertsolarien gisan 'payada' (payadoreak argentinar bertsolari tradizioanak dira) bat inprobisatu zuen Martin Fierro argentinar eleberri klasikoko gaucho-en bertsoetaz baliaturik (Martin Fierro 'Matxin Burdin' izenarekin dago euskaratuta). Bidelechea bikoteak kantu berri eta zaharrekin itxi zuen gaua. Eskerrak eman nahi diegu baita ere jaian parte hartu zuen musika eskolako gazteen koruari.

Aipamen berezia merezi du dantzaldi batekin ezustea eman zigun nagusien taldeak, jantzi eta koreografia tipikoekin une dibertigarria pasa arazi zigutelako: Ander Marucco García, Tito Quiñones, Alba Esperón, Santiago Torres Murua, Claudia Berasain, Liliana Victoria eta Manuel Zurutuza ekinean gogor jarraitzeko prest daude taldea indartzeko asmoz. Espero zitekeenez, asko dira jada dantza lantegian izena eman nahi dutenak, eta gutxi barru dantza berria gehituko dute: Tangoa.

Gaueko beste protagonistak Edgardo “Bilbo” Bilbao eta bere gurdia izan ziren, eurei esker eraman ahal izan baikenuen (joan eta etorri) Jaialdi Euskaren Eguna operazioko material guztia.

 

Euskararen Eguna 2008 (6)

[Edgardo 'Bilbo' Bilbao, Mero Echandi eta Martín Rojas Chorroarín Muleiro gitarrajolearekin (argazkia Hegoalde Argentinarra EE)]

A! Eta azkenik, Abuín eskribauaren begirada zorrotzaren pean txapelatik atera zen zenbakiak, 70ak, irabazle egin zuen Rio Gallegoseko biztanle ohi eta Bar Los Vascos tabernako jabe den Ramiro Kröeger jauna. Bere tabernak 50 urte egin ditu  Avenida Roca eta Santiago del Estero arteko bidegurutzean eta duela urte eta erdi, bertan egin zen Hegoalde Argentinarraren sorrera bilkura. Rio Gallegosetik Euskal Herrian nahi duten herrirako bi bidaia txartelekin batera Kröegerrek mila eurotako bidaia poltsa jasoko du".

Jaiaren irudi gehago gure Argazki Galerian

 

Komentarioa gehitu

Komentario bat gehitu zenezake formularioa betata

(Beharrezkoa)
Esaiguzu zure izena
(Derrigorrezkoa)
(Derrigorrezkoa)
(Beharrezkoa)
Idatzi irudiko hizkiak beheko kutxan. Spamari aurre egiteko captcha metodoa da hau.
Euskara munduko azken mugaraino heldu zen: Argentinako Patagoniako Euskararen Eguneko argazki kronika

Ramiro Kröeger zozketaren irabazlearekin topa egiten (argazkiak Hegoalde ArgentinarraEE)