dic ENE feb 7 2009 2010 2011 1 capturas 7 ene 10 - 7 ene 10

Cerrar Ayuda

UEUko Udako Ikastaroak

Atal honetan, Soziolinguistika Klusterrak Udako Euskal Unibertsitatean (UEU) eskainitako ikastaroen informazioa eskuragarri duzu. Urtez urteko egitarauaz gain, ahal den neurrian, ikastaroetan eskainitako materialak eta bestelako osagarriak ere izeki ditugu.

Kontuan izan 2002., 2003. eta 2004.eko ikastaroak ez zituela Soziolinguistika Klusterrak antolatu -artean sortu gabe baitzen-, baina klusterraren aitzindari izan den SEI elkarteak antolatu zituenez, eskura ditugun materialeak eskaintzea egokia iruditu zaigu .

2009 EUSKARA LAN MUNDUAN... LANEAN!

 

 

Euskara lan-munduan... lanean!

Baiona - 2009ko uztailaren 8 eta 9an

Euskara beste gaietarako gai ez zenean, burugogor batzuek zioten baietz, euskarak etxerako ez ezik, eskolarako eta kalerako ere balio zuela. Hori erakutsi nahian idatzi zuen Etxeparek Linguae Vasconum Primitiae. Eta harrezkero idatzi diren guztiak!

Orain beste kaskagogor batzuk dabiltza euskarak eskolarako ez ezik, lanerako ere balio duela esaten. Urte eta ahalegin batzuk pasatu dira dagoeneko eta fruitu batzuk ere eman ditu egindakoak.

Egindako horretatik ikasi eta eremu berrietara zabaldu nahian ari da, besteak beste, Soziolinguistika Klusterra. UEUren udako ikastaroa bildutako horren berri emateko erakusleiho egokia izango da.

Hiru dira, funtsean, ikastaro honen helburuak:

1. Lan-munduan euskara sustatzeko abian dauden egitasmoen berri zabaltzea.
2. Lan-munduan euskara sustatzeko erabilgarri izan daitezkeen diskurtso eta argudioak lantzea.
3. Lan-munduan euskara sustatzeko egitasmoak hobetzeari begira gauzatzen ari diren proiektuak azaltzea.

Hiru motatako saioak izango dira ikastaroan zehar:

1. Teoria mailako hitzaldi edo azalpenak.
2. Esperientzia aplikatuen azalpenak.
3. Talde ariketa tailerrak.

Saio guztietan zehar saiatuko gara emaile-hartzaile eskemarekin hautsi eta parte-hartzaileen arteko elkarrekintza errazten.

Lan-munduan euskara egiten ari den bidean interesa izan dezakeenari; aholkularitza-enpresa eta administrazioetako euskara-teknikariei, enpresetako langileei eta euskararen erabilera-esparruak zabaltzeari begira egiten ari den lanean interesa izan dezakeen edonori.

EGITARAUA

 



Euskara lan-mundua... lanean!

EGITARAUA - PDF
Uztailak 8a
9:00	Normalizazio Kasu Aurreratuak: zergatik eta zertarak - Karmele Perez Lizarralde (Huhezi -Mondragon Unibertsitatea)
10:00	2009ko Kasu Aurreratuak: IMH – Edurne Bilbao eta Isusko Diez, Bergarako Udala – Estepan Plazaola
11:00	ATSEDEN ALDIA
11:30	EraLan ikerketa-proiektua - Nekane Goikoetxea (Soziolinguistika Klusterra)
12:15	Euskal Herriko Laborantza Ganbara: euskararen erabilera sustatzeko plana - Jojo Bordagarai eta Bea Salaberri(AEK- Ahize)
13:00	BAZKARIA
15:00	Jabekuntza (empowermenta) euskara-planetan: egindako ibilbidea. Agurtzane Loidi Larrañaga eta Felipe Iñarra Laskurain- Elhuyar aholkularitza
Uztailak 9a
9:00	Enpresen Gizarte Erantzukizuna, baita euskararen arloan ere - Kepa Atutxa (Egaratu)
10:00	Ekolinguistikaren diskurtsoa lan-munduan - Abel Irizar (Emun)
11:00	ATSEDEN ALDIA
11:30	Udaletatik herriko enpresak euskarara erakartzeko diskurtsoa; Buruntzaldeko esperientziatik - Marifer Gorostiza (Lasarte-Oriako Udala)
12:15	Gernika-Lumoko Udaleko merkataritzaren plangintzaren ibilbidea - Estiñe Astorkia (Artez) eta Bittor Zarrabeitia (Gernika-Lumoko Udala)
13:00	BAZKARIA
15:00	Tailerra: diskurtsoa egoera zehatzetara egokitzen - Soziolinguistika Klusterra

Baionako Unibertsitatea - 2009ko uztailaren 8 eta 9an

 

 

SAIOEI BURUZKO INFORMAZIO GEHIGARRIA

KRONIKA

EUSKARA LAN MUNDUAN…LANEAN!- Baiona, 2009/7/8 eta 9 Aurten ere Soziolinguistika Klusterrak antolatu du berea UEUren udako ikastaroen artean. Lan mundua euskalduntzeko lehen ekimenak abian jarri zirenetik urte batzuk igaro direla eta, denbora tarte horretan emandako urratsak aztertzeko eta aurrera egiteko ildoez hausnartzeko asmoz antolatu zen Euskara lan munduan… lanean! ikastaroa uztailaren 8 eta 9an Baionako IUT unibertsitatearen egoitzan. Lehen eguna, lan munduan euskararen erabilera sustatzearekin lotuta Soziolinguistika Klusterra burutzen ari den proiektuen azalpenekin hasi zen. Karmele Perez irakasleak Euskararen Normalizazio Kasu Aurreratuak bildu eta zabaltzearen garrantziaz jardun zuen. Izan ere, normalizazioan izandako eraginagatik eta metodologia garatzerakoan duten esperientziagatik eredu bat dira eta antzeko helburuak bilatzen dituztenentzat duten baliagarritasuna agerian geratu zen.
	Proiektuaren kokapenaren ostean, 2008an landutako bi kasuen azalpenak entzuteko aukera izan zen. IMHko euskara planaren arduradunek (Edurne Bilbao eta Isusko Diez) urteetan zehar egindako ibilbidea azaldu zuten, euren ustez arrakastaren giltzarri izan direnetan arreta jarriz. Bergarako Udaleko euskara zerbitzuburu den Estepan Plazaolak, berriz, bere herriko esperientziatik hitz egin zuen eta azpimarratu zuen ideia hau izan zen: Udalaren, herritarren eta eragileen artean elkarreragitea ezinbestekoa dela normalkuntzaren bidean.
Hurrengo saioa, EraLan ikerketa-proiektuari buruzkoa izan zen. Nekane Goikoetxeak, proiektu honetan euskara planetan bide berriak lantzeko lidergo eraldatzailearen gaia nola lantzen ari diren kontatu zuen. Era berean, lantokietako erabileran eragina duen faktore honetaz gehiago jakin asmoz martxan jarri diren interbentzioen berri eman zuen. Jojo Bordagarai eta Bea Salaberriren txanda izan zen jarraian. Aek-Ahize aholkularitzako kideek Ipar Euskal Herrian abiatutako lan munduko lehen erabilera planaren nondik norakoak azaldu zituzten, Euskal Herriko Laborantza Ganbararena, hain zuzen ere. Plana martxan jartzeko lan munduko testuingurua guztiz erdalduna izatea eta Iparraldean arlo pribatu zein publikoan hizkuntza plangintza egituratu gabe egotea oztopo bezala aipatu zituzten. Baina jarraian, aldeko baldintzak ere bazirela azaldu zuten, hala nola, EHLGko giroa eta sektore euskaldunen artean erakundeak duen erreferentzialtasuna. Elhuyar aholkularitzako Agurtzane Loidik eta Felipe Iñarrak "ahalmentzea" zeri deitzen dioten azaldu zuten, erabilera planak dituzten erakundeetako kideek plana “bere egite", hain zuzen. Erakunde horietako langileek plana "bere egiteko” eta kudeatzen asmatzeko eragiten duten faktoreen hausnarketa prozesu bat burutu dute. Ikastaroan prozesua azaldu eta bertan bildutako ondorioen berri eman zuten. Bigarren egunean, lantokietan euskara sustatzeko diskurtso eta argumentuen inguruan jardun zuten hizlariek. Goizeko lehen hitzaldia Egaratuko kide Kepa Atutxak eskaini zuen. Enpresen Gizarte Erantzukizuna (EGE) lantzen duten lantegiek euskara kontuan hartu behar luketela defendatu zuen, gaur egun hala egiten ez den arren.

Abel Irizarrek, bigarren hitzaldian, ekolinguistikaren diskurtsoa zertan datzan azaldu zuen. Bioaniztasuna babesten den bezala, hizkuntza aniztasuna babestu beharraz kontzientzia sustatzeaz mintzatu zen. Horretarako argumentazioa eta diskurtsoa praktikan aplikatzeko neurri batzuk ere proposatu zituen.

Goizeko hirugarren saioaren ardura Marifer Gorostizak izan zuen. Buruntzaldeko udaletan egindakoa oinarri hartuta, udaletako euskara zerbitzuetatik sektore pribatuan eragin eta euskalduntzeko neurriak lan munduan zabaltzeko hainbat bide batzuk proposatu zituen. Segidan beste udal bateko kasua ezagutzeko aukera izan zen. Gernika-Lumoko euskara teknikari Bittor Zarrabeitia eta planaren aholkularitzaz arduratu den Estiñe Astorkiak udalerriko merkataritza euskalduntzeari begira garatutako planaz hitz egin zuten. Planaren 15 urteko ibilbidean jasotako ikasgaien berri eman zuten eta bidean topatutako oztopoei nola erantzun dieten azaldu zuten. Bazkalostean, ikastaroa borobiltzeko, tailer praktiko bat burutu zen Soziolinguistika Klusterreko Oihana Lujanbio eta Asier Basurtok dinamizatuta. Parte hartzaileak, lantaldetan, irudikatutako egoeratan kokatu ziren eta ikastaroan jasotako guztiaren artetik argumentuek egoera bakoitzerako zuten egokitasuna baloratu zuten. Eta honenbestez eman zitzaion bukaera soziolinguistikari buruzko ikastaroari. Giro atseginean elkarrengandik ikasteko aukera izan delakoan, hurrengo urtean parte hartzera animatzeko gonbidapenaz agurtu ziren Baionan elkartutakoak.

 

 

 

 

 

 

 

 

AURKEZPENAK ETA MATERIALAK

Karmele Perez Lizarralde	Normalizazio Kasu Aurreratuak: zergatik eta zertarako. Aurkezpena
Edurne Bilbao eta Isusko Diez	2009ko Kasu Aurreratuak: IMH Aurkezpena
Estepan Plazaola	2009ko Kasu Aurreratuak: Bergarako Udala Aurkezpena
Nekane Goikoetxea	EraLan ikerketa proiektua Aurkezpena
Jojo Bordagarai eta Bea Salaberri	Euskal Herriko Laborantza Ganbara: euskararen erabilera sustatzeko plana Aurkezpena
Agurtzane Loidi eta Felipe Iñarra	Ahalmentzea euskara planetan: egindako ibilbidea Aurkezpena
Kepa Atutxa	Enpresen gizarte erantzukizuna, baita euskararen arloan ere Materiala1 / Materiala2
Abel Irizar	Ekolinguistikaren diskurtsoa lan-munduan Aurkezpena Material osagarria
Marifer Gorostiza	Udaletatik enpresak euskarara erakartzeko diskurtsoa, Buruntzaldeko esperientzatik Aurkezpena
Estiñe Astorkia eta Bittor Zarrabeitia	Gernika-Lumoko Udaleko merkataritzaren plangintzaren ibilbidea Aurkezpena

SAIOEI BURUZKO INFORMAZIOA

KARMELE PEREZ LIZARRALDE (HUHEZI- MU)
Normalizazio Kasu Aurreratuak: zergatik eta zertarako
Hizlariari buruz...	Arrasate Euskal Filologian lizentziatua. Mondragon Unibertsitateko HUHEZI fakultatean dihardu lanean azkeneko 10 urteetan. Aurretik ere irakasle lanetan ibilia, bigarren hezkuntzan. Euskararen Normalizazio Kasu Aurreratuak proiektuaren zuzendaria da 2007az geroztik.
Saioari buruz...	Zer egin euskara norbere erakundean normalizatzeko? Galdera horri erantzun nahi dio Soziolinguistika Klusterrak, 2007. urtean abiatu zen Euskararen Normalizazio Kasu Aurreratuak proiektuaren bidez. Proiektuaren helburu nagusia euskara planekin abiatu diren erakundeen esperientzia eta ezagutza bildu eta zabaltzea da. Ezagutzaren Klusterrak egindako Kudeaketa Aurreratuko Enpresak argitalpenak eredu hartu eta soziolinguistika arlora egokitu ditugu. Honela, kudeaketan eredugarri diren kasuen ordez, euskararen normalizazioan eredugarri direnak aztertzen dira hemen. Proiektuak urtero bi kasu argitaratu ditu. Hauek dira orain arte argitaratutakoak: IMH, Makina Erremintaren Institutua Bergarako Udala ELAY Taldea EIKA Koop. E.
Gehiago jakiteko...	Normalizazio Kasu Aurreratuak

 

EDURNE BILBAO MAIZA eta ISUSKO DIEZ TORRE (IMH)
Normalizazio Kasu Aurreratuak: IMH
Hizlariari buruz...	Edurne Bilbao Maiza, Elgoibar Zuzendaritzako Idazkaritzako ikasketak IMHko langilea sorreratik eta bertako komunikazioburua 2000tik.Zuzendaritzako kidea. IMHko GOAZEN euskara planaren koordinatzailea sorreratik. BIKAIN ziurtagiriaren ebaluatzailea 2008an. Isusko Diez Torre, Deustu Euskal Filologian lizentziatua AEK-ko langilea 1996tik. 2005a arte irakasle eta trebatzaile lanetan aritua. Geroztik euskara teknikari lanetan AHIZE-AEKn. Egun IMH eta GARAPEN euskal agentzien elkarteko teknikaria eta AEK-ko beste normalizazio proiektu batzuetako arduraduna. BIKAIN ziurtagiriaren ebaluatzailea 2008an.
Saioari buruz...	IMH aurkeztu: kokapena, egoera soziolinguistikoa, IMHk eskaintzen dituen zerbitzu eta produktuak. Euskara planaren sorrera, helburu nagusia eta garapena: zergatik hasi, nora jo eta nola egin duen bidea. Erabilitako metodologia: 7 programen metodologiaren azalpena Planeko emaitza nagusiak eta balantzea azaltzea. Egungo eta etorkizuneko erronkak: Hizkuntzak kudeatzeko sistema, pertsonak, eleaniztasuna.
Gehiago jakiteko...	Normalizazio Kasu Aurreratuak: IMH www.imh.es www.aek.org

 

ESTEPAN PLAZAOLA (Bergarako Udala)
Bergarako Udala: 20 urte herria eta udala euskalduntzen
Hizlariari buruz...	Filologian lizentziatua eta itzultzailea, AEKn jardun zuen irakasle. Eusko Jaurlaritzako Hezkuntza Sailean trebatzaile eta IVAPen administrazioko hizkuntza eskakizunak lantzen eta finkatzen aritutakoa.. Bergarako Udaleko Euskara Zerbitzuan dihardu lanean azkeneko 20 urteetan.
Saioari buruz...	20 urte pasa dira Bergarako Udalak Euskara Zerbitzua sortu eta hizkuntza normalkuntzako lanari ekin ziola. Harrez gero, hainbat programa eta egitasmo bideratu izan ditu helburu argi batekin: Udaleko eta herriko ohiko hizkuntza euskara izatea. Urte horietan egindako lanaren ildo nagusiak azalduko dira aurkezpenean.
Gehiago jakiteko...	Normalizazio Kasu Aurreratuak: Bergarako Udala

 

NEKANE GOIKOETXEA AGIRRE(Soziolinguistika Klusterra)
EraLan2 ikerketa-proiektua: Lidergoa aztergai
Hizlariari buruz...	(Deba) Andoainen bizi da gaur egun. Euskal Filologian lizentziatua eta Hezkuntza Zientzietan doktorea. EMUN Koop. E.n jardun zuen teknikari eta baita Debako Udalean ere. Andoaingo Udaleko Euskara Zerbitzuan dihardu lanean azkeneko 9 urteetan. Eralan2 proiektuaren zuzendaria da 2008az geroztik.
Saioari buruz...	2006an ekin zitzaion EraLan ikerketa-proiektuari. Helburua, lan-munduko hizkuntza plangintzen gainean ekintza-ikerkuntza egitea zen. 2008an proiektuaren 2. faseari ekin diogu, oraingoan lidergoa aldagaian zentratuta. Hizkuntza kudeaketa erakunde ezberdinetan dituzten teknikariak daude lantaldean, hala nola, AFA, Ahize-Aek, Artez, Bermeoko Udala, Elhuyar Aholkularitza, Emun, GFA eta Kutxa. Ikastaro honetan, erakunde hauek egindako analisia konpartitu eta martxan jarriko dituzten interbentzioen berri emango da.
Gehiago jakiteko...	EraLan-i buruzko informazioa: http://www.soziolinguistika.org/eralan Lidergoari buruz egindako formazio-saioei buruzkoa: http://www.soziolinguistika.org/eu/node/3769 II. Euskal Soziolinguistika Jardunaldian EraLan-i buruz egindako aurkezpena: http://www.soziolinguistika.org/eralanjar/Lidergoa.pdf

 

AGURTZANE LOIDI LARRAÑAGA eta FELIPE IÑARRA LASKURAIN (Elhuyar)
Ahalmentzea (empowermenta) euskara-planetan: egindako ibilbidea
Hizlariari buruz...	Agurtzane Loidi Larrañaga. (Bergara, 1967) Antzuolan bizi da gaur egun. Irakaskuntzan jardun zuen. 1995etik Elhuyar Aholkularitzan dihardu. Euskal Herrian egindako lehen euskara-planean teknikari, Elay enpresan. Beste hainbat enpresatako euskara-planetan ere teknikari jardun du. 2003tik 2008ra Elhuyar Aholkularitzako koordinatzaile nagusia.   Felipe Iñarra Laskurain. (Bergara, 1969). Gorlizen bizi da gaur egun. Irakaskuntzan eta liburugintzan jardun zuen. 2005etik Elhuyar Aholkularitzan. Teknikari hainbat euskara-planetan, enpresa, udal eta udalerritan.
Saioari buruz...	Aurreak erakusten digu, beti esango genuke, atzeak zelan egin behar duen dantza. Enpresetako euskara-planak 18 urtean aldatu egin dira, doitu. Eta haien barruko lokailuek, pertsonek zein faktoreek, ez dute plana berdin bizi. Hitzaldiaren funtsa horixe izango da. Euskara-plana duten enpresetako pertsonak eta erakundeak berak zelan bereganatu dituzten planek emandakoak, zelan jabetu diren haietaz, zelan daroatzaten aurrera... Hori aztertzeko iturri bi erabiliko ditugu: gure esperientzia eta enpresetako aktoreek dioskuena. Haiengan oinarritu nahi dugu gure ikerketa eta haiei eman nahi diegu hitza.
Gehiago jakiteko...	www.elhuyaraholkularitza.net

 

KEPA ATUTXA EGILUZ (Egaratu)
EGE.- Enpresen Gizarte Erantzukizuna. Euskararen ardura, ere, lantzeko tresna
Hizlariari buruz...	(Zeanuri) Ekonomialaria, Gizarte Antropologoa, Soziologian Ikertzailea. Marketing eta kudeaketa sistematan urte luzez aritua. Gaur egun enpresa kudeatzailea.
Saioari buruz...	Kontzeptuak eta terminologia Interes taldeak (stakeholders), Barruko pertsonak, Hornitzaileak, Bezeroak, Gizartea. Erosketak, pertsonalaren kontratazioa eta kudeaketa, kontsumoa, Inbertsioak. Balantze hirukoitza. EGEren dimentsioak eta ezaugarriak Mehatxuak eta aukerak: Kontsumo gizartea, Globalizazioa, e.a. Portaera etikoa Urteroko memoria. Asebetetze adierazleak. Neurketa sistemak. Gaur egungo joeren adibidea: Itsaso Urdinen estrategia. Talde eztabaida
Gehiago jakiteko...	Hurbilketa interesgarri bat: PORTER, M. eta KRAMER, M.: “Strategy and Society. The link between competitive advantage and corporate social responsibility”. Harvard Business Review. (2006) abendua, 1-15.

 

ABEL IRIZAR MANTZISIDOR (Emun)
Ekolinguistikaren diskurtsoa lan munduan
Hizlariari buruz...	Elgoibar, 1979. Mutrikun bizi da gaur egun. Enpresa zientzietan diplomatua. Elgoibarko Izarra kultur elkartean hasi zen euskalgintzan, euskara teknikari lanetan hitzarmengintza arloko GUREAN BAI proiektuan, 7 urtez. Gaur egun EMUN kooperatibako proiektu-arduradun lanetan dihardu. Fagor, ULMA eta Antzuolako enpresetako euskara planetan izan du lan esperientzia hizkuntza aholkulari modura. HIZNETeko sakontze-egitasmoan ekolinguistikaren diskurtsoa landu du, Fagor Etxetresna Elektrikoak kooperatibaren nazioartekotzea oinarri hartuz.
Saioari buruz...	Enpresen hizkuntza-kudeaketarako ekolinguistikaren printzipioa onuragarria izan daitekeela azaltzea da saioaren helburua. Saioaren lehenengo zatian globalizazioaren aro honetan hizkuntza gutxituek bizi duten egoeraren diagnostiko laburra egingo da eta ekolinguistika zer den azalduko da. Ondoren, enpresen gizarte erantzukizuna ardatz modura hartuz, hizkuntzen garapen iraunkorraren kontzeptua enpresen hizkuntza-kudeaketan txertatzeko arrazoiak eta bideak azalduko dira. Amaitzeko, nazioartekotuta dauden enpresei begirako jarraibide eta aholku teoriko-praktiko batzuk aurkeztuko dira.
Gehiago jakiteko...	Irizar Mantzizidor, Abel (2007). Proposamen ekolinguistiko bat Fagor Etxetresna Elektrikoak kooperatibaren nazioartekotzerako. Hiznet 06-07ko sakontze egitasmoa (argitaratu gabe).

 

MARIFER GOROSTIZA NARBAIZA (Lasarte-Oriako Udala)
Enpresak euskarara erakartzeko diskurtsoa, Buruntzaldeko esperientziatik
Hizlariari buruz...	Irakasle ikasketak Eskoriatzan Euskal Filologia EHUn, Gasteizen. Euskalduntze-alfabetatze lanetan 22 urtez. Azkeneko 6 urteak Lasarte-Oriako Euskara Zerbitzuan, enpresa munduaren alorrean, eta esparru horretan Buruntzaldeko hainbat lanetan koordinatzaile.
Saioari buruz...	Euskararen erabilera normalizatzeko sustatze lanetan eman ditudan azken 6 urte hauetan, hamaika buelta eman diot erabili beharreko argudioen gaiari, eta horren azterketan nago oraindik murgildua. Asko esan eta idatzi da gaiaren inguruan. Entzundakoak eta irakurritakoak jasota saiatu naiz argudioen poltsa berria eratzen eta praktikan jartzen. Hasieran erabiltzen nituenak eta orain erabiltzen ditudanak zeharo ezberdinak dira, baina oraindik ez dauzkat guztiak nirekin, findu beharra edo sentitzen dut.
Gehiago jakiteko...	Gorostiza, M.. Nola sustatu euskara uda?????G??º??lerriko enpresetan, Lasarte-Oriako esperientzia (2008) Lasarte-Oriako Udala

 

ESTIÑE ASTORKIA KORTABITARTE eta BITTOR ZARRABEITIA BENGOA
Gernika-Lumoko Euskara Zerbitzuak merkataritzan garatutako kanpainaren ibilbidea
Hizlarieii buruz...	Bittor Zarrabeitia Bengoa: Gernika-Lumon jaioa (1960), Euskara Irakaslea (Labayru Ikastegia, 1979-1983), Gernika-Lumoko Udaleko Itzultzailea eta euskara/kultur dinamizatzailea (1984), Zuzenbidean Lizentziatua (1986), Hizkuntza Normalizaziorako Teknikaria (1994tik gaur arte). Estiñe Astorkia Kortabitarte: Ispaster (1980). Gaur egun Ajangizen bizi da. Euskal Filologiako ikasketak, (Pedagogiako ikasketak burutzen); Gernika-Lumoko Udaleko euskara dinamizatzailea (2006tik gaur arte); Artez Euskara Zerbitzuko teknikaria (2005etik gaur arte) :merkataritza planen koordinatzailea eta zenbait enpresa eta erakundetako euskara planen kudeatzailea. Bikain ziurtagiriaren ebaluatzailea 2008an
Saioari buruz...	Gernika-Lumoko merkataritza planaren ibilbidea. 1993tik gaur egun arteko bilakaera eta etorkizuneko erronkak. Herriko merkataritza, ostalaritza, eta enpresak euskalduntzen erabilitako metodologian izandako aldaketa eta hobekuntzak, hausnarketa, eta aurrera begirako erronka nagusiak izango ditugu hizpide. Baliabideak Zerbitzua eskaintzeko irizpideak Ebaluazio sistemak Estrategiak
Gehiago jakiteko...	www.gernika-lumo.net www.artez.net

 

 

ARGAZKIAK

2008 EUSKARAREN LEGEAK: ESPERIENTZIA PRAKTIKOAK ETA AUKERAK

 

2008an ere, urtero bezala, Udako Euskal Unibertsitateak antolatutako ikastaroen artean Soziolinguistikaren ingurukoa antolatzeaz arduratu zen Soziolinguistika Klusterra. Ikastaroa Baionan burutu zen uztailaren 15 eta 16an eta aukeratutako gaia eta ikastaroaren izenburua honakoa izan zen: Euskararen legeak: esperientzia praktikoak eta aukerak.

 

EAEko Euskararen Legearen 25. urteurrenean gaudela eta hizkuntzaren inguruko lege eta dekretuen sorrera eta aplikazio berriak gizartean ematen ari diren zeresanak erakarrita, interesgarri ikusi da hizkuntzaren erabilera arautzen duten legeriek euskararen normalkuntzaren aldeko lanean izan duten, duten eta izan dezaketen eraginaz jardutea. Xede horri begira, gaiaren inguruko euren ikuspegia emateko legeria eta euskarak sektore eta testuinguru administratibo ezberdinetan duten harremana gertutik ezagutzen duten adituek osatu dute ikastaroko irakasle taldea. Hauen ekarpenari esker, gaiaren funtsezko alderdiak jorratzen dituen egitaraua osatu genuen:

 

 

EGITARAUA

UZTAILAREN 15A, ASTEARTEA

-------------------------------------------------------------------------------------------------

9:00-10:00
Legeak eta hizkuntza eskubideak, kasu praktiko bat: Nafarroaren kasua.

Iulen Urbiola (EKE)

 

10:00-11:00
Euskararen ofizialtasunaren historia.

Joseba Intxausti (Euskaltzaindia)

 


11:30-12:30
Euskararen ofizialtasuna eta iraupena zuzenbidearen ikuspegitik

Iñaki Agirreazkuenaga (EHU)

 


14:30-15:30
Hizkuntza irizpideak administrazioa, lanpostuz lanpostuko eginkizunetan.

Patxi Saez (Azpeitiko Udala)

 


15:30-16:30
Legearen azken garapenak: Kontsumitzaileen eta erabiltzaileen hizkuntza eskubideei buruzko Dekretua

E. Osa (Hizkuntza Politikarako Sailburuordetza)

 


UZTAILAREN 16, ASTEAZKENA

---------------------------------------------------------------------------------------------------------

9:00-10:00
Hizkuntz eskubideen eta lege statusaren egoera Euskal Herrian

Arantza Haranburu (Behatokia)

 


10:00-11:00
Tailerra: Hizkuntza zuzenbidetik praktikara. Esperientzien gurutzaketa eta proposamenak: Udalak euskaldundu.

Elhuyar


11:30-12:30
Euskara eta legeria Ipar Euskal Herrian: Gizarte elebidun baterantz aukerak eta mugak

Battittu Coyos (Iker-Baiona)

 


14:30-15:30
Kutxako esperientzia: legeak baino gehiago, bezeroak.

Mikel Irizar (Gipuzkoako Donostia Kutxa)

 


15:30-16:30
Tailerra: Hizkuntza zuzenbidetik praktikara. Esperientzien gurutzaketa eta proposamenak: Lantegiak euskaldundu.

Elhuyar

 

KRONIKA

KRONIKA

EUSKARAREN LEGEAK: ESPERIENTZIA PRAKTIKOAK ETA AUKERAK

 

2008ko honetan ere, urtero bezala, Udako Euskal Unibertsitateak antolatutako ikastaroen artean Soziolinguistikaren ingurukoa antolatzeaz arduratu da Soziolinguistika Klusterra. Aurtengo ikastaroa Baionan burutu da uztailaren 15 eta 16an eta aukeratutako gaia eta ikastaroaren izenburua honakoa izan da: Euskararen legeak: esperientzia praktikoak eta aukerak.

 

EAEko Euskararen Legearen 25. urteurrenean gaudela eta hizkuntzaren inguruko lege eta dekretuen sorrera eta aplikazio berriak gizartean ematen ari diren zeresanak erakarrita, interesgarri ikusi da hizkuntzaren erabilera arautzen duten legeriek euskararen normalkuntzaren aldeko bidean izan duten, duten eta izan dezaketen eraginaz jardutea. Xede horri begira, gaiaren inguruko euren ikuspegia emateko, legeria eta euskarak sektore eta testuinguru administratibo ezberdinetan duten harremana gertutik ezagutzen duten adituek osatu dute ikastaroko irakasle taldea. Hauen ekarpenari esker, gaiaren funtsezko alderdiak jorratzen dituen egitaraua osatu genuen.

 

Ikastaroari hasiera emateko, Joseba Intxaustiren eskutik, euskarak historikoki izan duen status legalaren bilakaera ezagutzeko aukera izan zen. Azken mendeetako baldintza historiko sozialak aldatu ahala euskaldunon hizkuntzaren egoerak jasandako aldaketez aritu zen Euskaltzaindiko kidea. Administratzaile publikoek hizkuntzekiko ezarritako arauak garaiko gizarte testuinguruan kokatuaz errepaso historikoa egin zuen.

 

Euskara Kultur Elkargoko zuzendari den Iulen Urbiolaren txanda etorri zen jarraian. Nafarroan euskarak eta herritarren hizkuntz eskubideek izandako bilakaera eta gaur egungo egoera aztertu zituen. Foru Erkidegoko legeriaren moldaketa bakoitzak izandako eraginak, nafar gizartearengan sortutako erreakzioak eta legeak praktikara eramaterakoan izanAdako gorabeherak azaldu zituen.

 

Atsedenaldi bat egin ostean, euskararen ofizialtasunari zuzenbidearen ikuspegitik erreparatu zitzaion gaiaren lanketa teorikoan eta aplikazio praktikoan esperientziadun Iñaki Agirreazkuenagaren eskutik. Bere hitzaldian lege testuetan hizkuntza ezagutzeko derrigortasuna jasotzeak dakartzan ondorioak eta aukera horrek instituzioen hizkuntza politikan suposatzen duen baldintzapena aztertu eta erlatibizatu zituen. Horrez gain, euskararen ezagutza euskal gizartearen gehiengo esanguratsu batera hedatzeak legeen garapenari aukera asko irekiko lizkiokeela eta hizkuntza normalkuntzarako baldintza legalak sortzeko oztopoetako bat gainditzea suposatuko lukeela azpimarratu zuen.

 

Arratsaldeko saioari hasiera emateko, Azpeitiko Euskara Patronatuaren zuzendaria den Patxi Saezen eskutik, euskarak lege aldetik administrazioaren sektorean izan ditzakeen aukerez gehiago jakiteko parada izan genuen. Azpeitiko udalean praktikan jarritako neurriez aritu zen, lanpostuz lanpostuko eginkizunetan hizkuntza irizpideak finkatzeaz hain zuzen ere. Ekimen honen nondik norako nagusiak

 

Lehen eguneko egitaraua borobiltzeko, gaurkotasunez beteriko gai baten berri jaso ahal izan zuten Baionan bildutako ikasleek, zuzen-zuzeneko ezagutza duen irakaslearen eskutik. Erramun Osak Eusko Jaurlaritzako Hizkuntza Politikarako Sailburuordetzak eta Merkataritza, Kontsumo eta Industria Segurtasuneko sailburuordetzak berriki aurkeztutako Kontsumitzaileen eta erabiltzaileen hizkuntza eskubideei buruzko dekretuaz hitzaldia eskaini zuen. Dekretu hau sortzeko jarraitutako prozesua azaldu zuen hasteko, egungo egoeraren diagnosi bezala erabilitako ikerketen nondik norakoak eta dekretuko neurrien kontrasterako erabilitako bideak azalduaz, besteak beste. Eta jarraian, dekretuaren edukietan sartu zen bete-betean, ekarriko dituen aldaketa eta betebeharren xehetasunak emanez. Ondorio bezala, kontsumitzaileen eskubideen deAkretua 25 urte bete berri dituen Euskararen Legeari garapenerako aukerak geratzen zaizkionaren froga dela nabarmendu zuen, besteak beste.

 

Ikastaroaren bigarren eguna hasteko, Iparraldean euskarak lege aldetik dituen muga eta aukerez mintzatu zen Battittu Coyos. Frantziar estatuko lege eta hizkuntz politikaren atzean dagoen ideologiaz aritu zen, Iraultza aurreko garaietako zenbait autoreren testuetan jasotakoak gaur egungo legeriaren atzean dauden ideien isla izaten jarraitzen dutela aipatuz. Legeriak Ipar Euskal Herrian gizarte elebidunaren norabidean suposatzen duen baldintzapena aztertu zuen eta euskalgintzako eragileen jardunak administrazioaren hizkuntza politikan izan dezakeen eraginaz ere jardun zen.

 


Hizkuntz Eskubideen Behatokiko Arantza Haranburuk hizkuntz eskubideek lurralde ezberdinetan bizi duten egoeraren diagnosi saio bat burutu zuen. Euskarak Euskal Herrian dituen bost status legalak banan bana aztertu zituen, hauetako bakoitza arautzen duten lege nagusiak aipatuz. Honen harira, korpus juridiko desegoki batek hizkuntz eskubideen bermea guztiz baldintzatzen duela azpimarratu zuen. Gainera, adibide errealak erabiliz, Behatokian jasotako hizkuntz eskubideen urraketa salaketen artean ohikoenak zerrendatu zituen.

 

Goizeko lanak bukatzeko, Elhuyar Aholkularitzako Helene Armentia eta Lur Etxeberriak koordinatuta, euskararen normalkuntzari begira zuzenbideak udal mailan eskaini ditzakeen aukeren gaineko tailerra burutu zen jarraian, Ikasleen arteko iritzi eta esperientzien trukerako abagunea ematen zuen dinamika baten bidez, udal teknikariek lanean topatzen dituzten oztopo nagusiak gainditzeko eta topa ditzaketen aukerak aprobetxatzeko proposamenen inguruko hausnarketa burutu zen

 

Dagoeneko azken txanpan sarturik, lan munduan euskara eta legeriaren arteko harremana jorratu zen bazkalostean. Lehendabizi Mikel Irizarrek Kutxan hizkuntzen tratamenduari dagozkion erabakietan aurrera daramaAten ildoaz hitz egin zuen eta enpresen munduan euskararen normalkuntzarako baliabideak eta ahaleginak eskatzerakoan erabili beharreko diskurtsoaz aritu zen besteak beste. Hizkuntza normalkuntza enpresaren baloreekin lotu beharra eta enpresaren funtzionamenduaren ohiko prozesuetan txertatu beharra nabarmendu zituen. Enpresak hizkuntza normalkuntzan izan dezakeen eraginaren diskurtsoaren aurretik, hizkuntza normalkuntzak enpresan izan dezakeenaren gainekoa hobetsi zuen, enpresetako arduradunei zuzentzerakoan.

 

Ikastaroko azken saioan, Elhuyar aholkularitzako teknikariek antolatutako dinamikaren bidez lan munduan hizkuntzen erabilera arautzen duten lege eta dekretuen inguruko ariketa parte hartzailea burutu zen. Zehatzago esanda, Jaurlaritzak aurkeztutako kontsumitzaileen eskubideen dekretura egokitu beharrean topatzen den enpresaren paperean jarri ziren ikasleak eta eman beharreko pausoak adostu zituzten taldetan banatuta.

 

Honaino aurten UEUren udako ikastaroen barruan Soziolinguistika Klusterrak antolatutakoak eman zuena. Bertaratutako ikasleek, gaian aditu eta aritu diren irakasleen eskutik, euskararen erabilera arautzen duen legeriaren alderdi anitzak ezagutu zituzten eta aldi berean, bakoitzak bere esperientziaren berri eman eta besteena jasoz elkarrengandik ikasteko aukera izan zuten. Bi egun hauetan izandako uda giro jatorra eredu hartuta, datorren urtean soziolinguistikaren inguruko beste gairen bat lantzeko aukera izango da.

MATERIALAK

Battittu Coyos Euskara eta legeria Ipar Euskal Herrian
Erramun Osa. Ez inposatu, ez eragotzi, euskara baliatzeko aukerak areagotu
Julen Urbiola. Euskararen ofizialtasunaren historia.
Patxi Saez. Hizkuntza irizpideak administrazioa, lanpostuz lanpostuko eginkizunetan.
Arantza Haranburu. Hizkuntza-eskubideen eta lege statusaren egoera EHn
Mikel Irizar. Legeak baino gehiago... bezeroak

ARGAZKIAK

2007 HIZKUNTZA PLANGINTZAREN ALDE TEORIAK ETA APLIKATUAK

 

Azken hogei urtetan, EAEn izan diren aurre-pausuak plangintza linguistikoari dagokionez handiak izan dira. Ezin gauza bera esan Iparraldean eta Nafarroan. Plangintza orokorra egiteko erakunde bereziak sortu dira herrialde bakoitzean eta beste maila batean erkide eta udaletxe askotan. Ikastaro honen helburua hizkuntza plangintzari buruzko gogoetak bultzatzea da, plangintzaren oinarri teorikoak eta horien aplikazioa errealitatean aurkeztuz.

 

Ikastaro honen helburua hizkuntza plangintza dihardutenei tresna teoriko eta praktikoak ematea da haien lana laguntzeko eta norbanakoari hizkuntza plangintzaren inguruan formazio efiziente eta koherente bat ematea. Bide batez normalizazio linguistikoaren eta plangintzaren arteko lotura aurkeztuko dira eta datozen urteetako erronka berriak zeintzuk izango diren aurreikusten saiatuko gara. Hori horrela izanik, hizkuntza plangintzaren inguruan egin diren hainbat egitasmo aurkeztea eta aurrera begira gogoeta batzuk egitea izango dira ikastaro honetako helburu nagusiak.

 

Horretarako oinarri teorikoak landuko ditugu soziolinguistikako zein soziologiako eta psikologiako ikuspuntuetatik. Bestetik, alderdi praktikoa landuko ditugu, hizkuntzaren plangintzari buruzko esperientzia praktikoak aurkeztuz. Ikastaro honetan landuko den hizkuntza plangintza ez da mugatua eremu bati, plangintza makro eta mikro mailetan aurkeztuko da.

HELBURUAK

Ikastaro honen helburua norbanakoaren plangintza soziolinguistikoari buruzko ezagupenak areagotzea da, gainera euskara teknikariei eta lantegi pribatuko langileei soziolinguistika teorikoari eta praktikoari buruzko informazio eta tresna berriak ematea da. Ikastaro honetan elkar emana bereziki landuko da , eztabaidak bultzatuz eta elkarren ezagupen eta esperientzien berri emanez.

METODOLOGIA

Erabilitako metodologia teorikoa eta praktikoa izan da. Teoria mailan landutako tresnek praxis mailan zein ondorioak izan dituzten aurkeztuz eta eztabaidatuz.

NORI ZUZENDUTA

Euskara teknikariei, euskararen inguruan lan egiten duten elkarteen kideei, irakasleei, gizarte-gaietan diharduten ikasleei, oro har, euskararen gaiarekiko interesa duten guztiei

LANDUTAKO GAIAK

Hizkuntza politika, Hizkuntza plangintza, Normalizazio linguistikoa, Euskara, soziolinguistika, hizkuntza minorizatua, mikro plangintza, makro plangintza e.a.

 

• EGITARAUA

MATERIALAK

 
 

• Oihana Lujanbio.
  Lan giroko hizkuntza erabileran eragiten duten aldagaiak
• Roberto Gutierrez.
  Bai Euskarari Akordioaren prozesua eta Bai Euskarari Ziurtagiria: arlo sozioekonomikoan
  eragiteko esperientziak
• Amaia Agirre. LinguaNet:
  Lan Mundua Euskara Plangintza Ikastaroa
• Aizpea Otaegi. Hizkuntza-Plangintzak:
  Teoriak eta praktikak
• Jaime Altuna.
  Haur eta Gazteen Aisialdiko Hizkuntza Plangintzak
• Lionel Joly.
  Egoera soziolinguistikoaren azterketa: plangintzaren oinarria eta ebaluazioa
• Txerra Rodriguez. Hizkuntza
  plangintza eta elkarteak: iragana, oraina eta etorkizuna

2006 ERRONKA BERRIAK EUSKARAREN ERABILERAN

 

 

 

 

 

Azken hogei urteotan EAEn euskararen ezagutza mailan izan diren aurrerapausoak handiak izan dira. Ezagutza jorratu eta gero, hizkuntzaren erabilera izaten da hizkuntza plangintzaren hurrengo helburu nagusia. Izan ere, sarritan esan ohi den bezala, euskararen erabilera da kezka nagusietako bat euskararen normalizazio prozesuan, erabilera-mota eta neurria direlako normalizazio mailaren adierazpen nagusia. Euskarak erabilera erronka berriak eskatuko ditu datozen urteetan. Hori horrela izanik, erabileraren inguruan egin diren hainbat egitasmo aurkeztea eta aurrera begira gogoeta batzuk egitea izan dira ikastaro honetako helburu nagusiak.

 

Horretarako, batetik, oinarri teorikoak landu ditugu soziolinguistikako, soziologiako eta psikologiako ikuspuntuetatik. Bestetik, alderdi praktikoa landu dugu, erabileraren kudeaketari eta plangintzari buruzko esperientzia praktikoak aurkeztuz. Ikastaro honetan, euskararen erabilera eremu batean baino gehiagotan aztertu da: gazteen erabilera, lantokietako erabilera eta euskararen erabilerari buruzko plangintzak

 

NORI ZUZENDUTA

Euskara teknikariei, euskararen inguruan lan egiten duten elkarteen kideei, irakasleei, gizarte-gaietan diharduten ikasleei, oro har, euskararen gaiarekiko interesa duten guztiei.

 

EGITARAUA

MATERIALAK:

• Erabilera ikertu eta Bultzatu: Soziolinguistika Klusterraren egitasmnoak aurrera begira - Lionel Joly
• Euskal Eskolak hizkuntzen erabilera eta euskararen indarberritzea ahalbidetzeko markoa - Erramun Osa
• Hizkuntzak etnografia ere behar du. Gazteak eta euskara ikuspuntu antropologiko batetik - Jone Miren Hernandez
• BAI Euskarari akordioa herrietan - KONTSEILUA
• Euskararen erabileraren normalizazioa Gipuzkoako Foru Aldundian - J. Amondarain.

 

 

2005 GLOBALIZAZIOA, MIGRAZIOA ETA HIZKUNTZAK

 

 

 

 

 

Globalizazioa, mundializazioa... modukoak, egunetik egunera sarriago eta ozenago entzuten ditugu. Aurreikus ote liteke zer-nolakoa izango den delako hizkuntza-aniztasunaren etorkizuna ? Zein eratako diskurtsoak daude gai honen harira? Zer-nolako arazo eta erantzun sortzen edota nagusitzen dira? Globalizazioak eta migrazioek eragindako edo areagotutako hizkuntzen arteko ukipen eta hizkuntza-aniztasuneko egoeren aurrean, zer erantzun egon ohi dira?

Ikastaro honetan, batetik, soziologia zein filosofiaren ikuspegitik oinarri teorikoak landu nahi ditugu (fenomeno hauek ulertzen, eta ondorioz kudeatzen, lagunduko digutenak). Bestetik, soziolinguistikaren ikuspegitik dauden formulazioak, diskurtsoak, interpretazioak... jaso nahi ditugu. Horrekin batera, egoera jakinetan (hemen nahiz beste lekuetan) sortu diren hizkuntza-arazoak eta –bereziki– eman zaizkien erantzunak ere eman nahi ditugu aditzera.

NORI ZUZENDUTA

Etorkinei zuzendutako era guztietako ekimen eta programak antolatzen dituzten teknikariei (euskara-teknikariak, berdintasun-teknikariak, gizarte-zerbitzuak...), irakasleei, gizarte-gaietan diharduten ikasleei eta, oro har, gaiarekiko interesa duten guztiei.

 

EGITARAUA

2003 EUSKARAREN JARRAIPENA III. EMAITZAK ETA ONDORIO NAGUSIAK

 

 

SOZIOLINGUISTIKA APLIKATUAN IKASTAROA

EUSKARAREN JARRAIPENA III. Emaitzak eta ondorio nagusiak

2003

 

2002. urtean antolatu genuen lehen aldiz ikastaroa Eibarren, UEUko Soziolinguistika sailarekin elkarlanean. Asmoz Fundazioak antolatzen duen HIZNET graduondoko formazio ikastaroa sortu berritan, egoki eta osagarri ikusi genuen ezagutza soziolinguistikoa ikuspegi praktikoago batetik landuko zuen ikastaro bat eratzea.

Horrela sortu zen ikastaroa: “Urrats berriak hizkuntz berreskurapen lanetan. Eibarko ikastaroak 2002”. Bertako saioetan aukera izan genuen soziolinguistikazko ezagutza ikuspegi praktikotik, eguneroko berreskurapen ekimenen ikuspegitik lantzeko.

2003ko ikastaroa xede berarekin antolatu genuen: azken urteotako soziolinguistikazko ikerketak, datuak eta ondorioak ezagutzea eta lantzea, euskararen berreskurapen lanetan gaur abian diren egitasmoetan duten aplikagarritasunaren ikuspegitik. Modu honetan, SEIren helburua da egun indarrean diren egitasmoak errealitate berrietara egokitzen laguntzea, eragileen arteko elkartrukea bultzatzea eta orientabide teoriko-praktiko berriak eskaintzea.

Edukiak lantzeko garaian UEUko Soziolinguistika Sailarekin eta Eusko Ikaskuntzako Asmoz fundazioarekin aritu gara elkarlanean.

Helburuak

• Azken urteotan euskal soziolinguistikaren esparruan egin diren ikerketa lanak, jaso diren datuak eta garatu diren ekimen berriak ezagutzera ematea eta egileekin aurrez aurre sakontzeko aukera eskaintzea.
• Ezagutza soziolinguistikoa aplikazioaren ikuspegitik lantzea
• Euskararen berreskurapen lanetan dihardutenei elkar ezagutzeko, esperientziak trukatzeko eta gaiak eztabaidatzeko gune bat eskaintzea, ideia eta elkarlan berriei ateak zabalduz.
• HIZNET ikastaroko ikasleei formazio teoriko orokorra egungo esperientzia praktikoekin eta datu zein ekimen berriekin osatzeko aukera ematea.

 

 

• EGITARAUA
• Olatz Altuna: Kale erabileraren neurketa 2001 eta azken urteotako bilakaera
• Iñaki Martinez de Luna: Euskal Herriko gaztetxoen hizkuntza egoera aztertzeko eredua
• Pello Jauregi: Erabilera ohituren aldaketa: eskatzen dituen baldintzak
• Unai Amezaga: Getxoko gazte elkarteak eta euskara
• Ainhoa Beraza: Hizkuntzaren transmisio naturala
• Ibon Usarralde: Bizitasun etnolinguistikoaren neurketa udalerrietan: ondorioak eta lan ildoak
• Paula Kasares. Hizkuntz eskubideen egungo egoera. Beltzuneak, aurrerapausuak eta lehentasunak. Behatokiaren azterketa.
• Mikel Urdangarin. Lan mundua berreuskalduntzeko marko teoriko-metodologikoaren bila: hiru erabilera-planen azterketa eta ondorioa.
• Amaia Rodriguez. Euskara faktore integratzaile gisa: etorkinak

 

2002 URRATS BERRIAK EUSKARAREN BERRESKURAPEN LANETAN: EIBARKO IKASTAROAK

1. Hizkuntza egoeraren neurketarako, diagnosirako eta prospekziorako tresna eta esperientzia berriak
2. Gazteen artean euskararen erabilera areagotzeko egitasmoak
3. Hizkuntza hautua ukipen egoeran: hezkuntzaren mugak, Kataluniako ikasbidea
4. Bizindar etnolinguistikoa udalerriaren ikuspegitik: azken ikerketak eta esperientziak
5. Euskal Herriko Hizkuntz Egoera: azken datu nagusienak
6. Euskararen historia soziala: ikerketa lanen azalpena eta "tertulia"
7. Herrietako plan estrategikoak eta hizkuntz bilakaera aztertzeko adierazle sistemak
8. Ikerketa lan eta ekimen berriak

Hizkuntza egoeraren neurketarako, diagnosirako eta prospekziorako tresna eta esperientzia berriak
Lore Erriondo	Neurkareletik eta Mintzagrama; oinarria eta erabilpena
Ikastetxeetako Normalkuntza planen garapena ebaluatu ahal izateko tresnak eta laguntzak ez dira oraindik oso ugariak, baina dagoeneko batzuk baditugu. Lore Erriondok ikastetxeetako normalizazio maila neurtzeko Neurkareletik eta Mintzagrama aplikazio informatikoen oinarria eta funtzionamendua azaldu dizkigu adibide praktikoetan oinarrituz.
Olatz Altuna	Begira. Prospekzioak egiteko modua, esanahia eta ariketa praktikoak.
Nola jakin orain arteko erritmoarekin zenbat euskaldun egongo den gure herrian 6-8-10 urte barru? Begira-rekin, ditugun datuak sartu eta berehala jakingo dugu ezagutzaren eta erabilera isotropiakoaren bilakaera zein izango den.
Olatz Olaso	Ofercat Euskal Herrian: Euskaintza, Azpeitiako esperientzia
Zenbatekoa da euskaraz gure herrian dagoen eskaintza (oro har)? Eta, nola neurtu? Kataluniako zenbait hizkuntza teknikarik herrian katalanezko eskaintza zenbatekoa den jakiteko tresna oso erabilgarri bat garatu dute. Saio honetan tresna hau Euskal Herrira egokitzeko martxan den ekimenaren berri izan dugu.
Gazteen artean euskararen erabilera areagotzeko egitasmoak
Diego Egizabal	Kuadrilategi egitasmoa: oinarriak eta azken urteetako esperientziaren ondorioak
Kuadrilategi egitasmoa aitzindaria eta berritzailea izan da gazteen artean taldekako euskararen ikaskuntza-prozesu naturala antolatu eta dinamizatzeko, euskararen erabilera areagotzeko bide berriak zabalduz. 5 urteko esperientziaren ondoren, egitasmoaren oinarriak eta gaur egun duten antolaketa, funtzionamendua eta helburuen berri eman digute.
Iñaki Eizmendi eta Saioa Larruskain	"Lagunarteko hizkerarekin jolasean" KukuMiku-k eta Urtxintxak garaturiko egitasmoa
Nola eskaini euskara ikastetxean soilik (edo nagusiki) jasotzen duten gazteei beren lagunarteko hizkera aberasteko aukerak? Edo beste era batera esanda; nola eskaini aukera erreal bat lagunarteko egoera informaletan –gustukoenetan- euskaraz egin dezaten? Ttakun elkarteko Kuku-Mikuk haur eta gazte sailak eta Urtxintxak egitasmo berri bat sortu dute gabezia garrantzitsu honi erantzuteko.
Hizkuntza hautua ukipen egoeran: hezkuntzaren mugak, Kataluniako ikasbidea
Imanol Esnaola	"Konjunzio eredua eta hizkuntza erabilera Santa Coloma de Gramaneten" (Xavier Vila irakaslea)
Irakaskuntza mailan asko aurreratu dugu etorkinen bigarren belaunaldiko haur eta gazteei bertako hizkuntzan ezagutza emateko metodoetan eta aukeretan. Baina, eskolak lortzen al du haur horien erabileran eragitea? Hizkuntza eskolan soilik jaso duenak ondoren zein esparrutan erabiltzen du? Non daude eskolaren mugak erabilerari dagokionez? Imanol Esnaolak Kataluniako Xavier Vila irakasleak gai honi buruz eginiko tesiaren eduki nagusiak azaldu dizkigu.
Itsaso Garmendia	Hizkuntza hautua Bartzelonan eta Arrasaten ("De qué vas, tio" eta "Triar no és trair" lanen laburpena eta "Representaciones cognitivas: un factor decisivo en la conducta lingüística" azterlanaren azalpena.)
Hizkuntza bat erabiltzeko adinako gaitasuna dagoenean, zein aldagaik eragiten dute hizkuntz aukeraketan? Zeren arabera egiten dute egungo gazteek hautua? Itsaso Garmendiak Katalunian gai honi buruz argitaraturiko bi lanen ondorio nagusiak azaldu dizkigu eta berak Arrasaten garaturiko azterketaren emaitzak. Besteak beste, giza irudikapenak kontzeptua eta beronek gure hizkuntz hautuan duen eragina ezagutzeko aukera izan dugu.
Bizindar etnolinguistikoa udalerriaren ikuspegitik: azken ikerketak eta esperientziak
Ibon Usarralde	Bizindar etnolinguistikoaren azterketa udalerrietan
Euskaraz hitz egiteko gaitasunaren eta euskararen mota guztietako erabileraren arteko tartea gero eta handiago izatea, kezka iturri zaigu. Euskarazko gaitasuna, erabilera baino abiadura biziagoan ari da hazten. Jauzi horren azalpenean, komunitate euskaldunaren bizindar etnolinguistikoak zeresan handia du. Komunitate euskaldunaren osasunaren berri izan nahian bizindar etnolinguistikoaren neurketa egin dute Arrasate, Lasarte-Oria, Bergara, Andoain eta Hernaniko Euskara Zerbitzuek elkarlanean. Kontzeptu eta tresna teoriko horren babesean, gizabanakoen hizkuntza portaera hautuan eragina duten ahalik eta aldagai gehien kontrolatzen saiatu dira. Ibon Usarralde soziologoak azaldu dizkigu ikerketaren nondik norakoak.
Arrate Mardaras eta Iosu Errazti	Lanbide Heziketan euskararen erabilera sustatzeko Iurretako esperientzia
Lanbide Heziketan irakaskuntza euskaraz eskaini ahal izateko zailtasunak, trabak eta gabeziak handiak izan dira orain arte. Modulu berrien antolaketarekin, gainera, zailtasunak ugaritu egin dira. Urteak dira Iurretako Institutuan lanbide heziketan euskararen normalizazioa bultzatzen dihardutela (ikasgaiak euskaldundu, praktikak, ikastetxearen funtzionamendua...). Bertako bi arduradunek esperientzia honen berri eman digute.
Edorta Arana	Herri eta bailara mailako telebisten eragina bizindar etnolinguistikoan: Euskal Herriko esperientziak
Komunitate batean bizindar etnolinguistikoan aldagai ezberdin askok eragiten dute. Gaur egungo gizartean, komunikabideak dira aldagai hauen artean eraginik zuzenena dutenetariko batzuk. Edorta Aranak, Euskal Herri mailan herri eta bailara telebisten egoera eta bilakaera aztertzeko abian duten ikerketaren berri emango digu.
Euskal Herriko Hizkuntz Egoera: azken datu nagusienak
Iñaki Martinez de Luna	Hizkuntz egoera ulertzeko proposamena Euskal Herriko gaztetxoen hizkuntz egoeraren eskutik
Datozen urteetan euskarak ezagutuko duen bilakaera aurreikusteko funtsezkoa zaigu gaur egungo gazteen hizkuntz errealitatea (erabilera, jarrerak, gaitasuna...) eta beronen bilakaera ezagutzea. Iñaki Martinez de Lunak, "Etorkizuna aurreikusten 99..." ikerketan eta Gazte donostiarren hizkuntzarekiko harremanak azterlanetan oinarrituz, egoeraren ezaugarri nagusiak eta emaitzen irakurketa egiteko eredu bat azaldu dizkigu.
Olatz Altuna	Euskal Herriko Euskararen Erabileraren Kale Neurketa 2001. Emaitzak eta ondorioak
1989az geroztik 4 urtez behin egin izan da Euskal Herriko Kale Erabileraren Neurketa. Herriz herri egindako neurketa hau euskara zenbat erabiltzen den jakiteko erreferentzia nagusia da, eta baita zonaldeka zein adin taldeka daramagun bilakaera ezagutzeko ere. Olatz Altunak 2001eko azaroan egin berri den neurketaren emaitzak eta jasotako datuen irakurketa eskaini dizkigu.
Euskararen historia soziala: ikerketa lanen azalpena eta "tertulia"
Roldan Jimeno	Hizkuntza komunitatea nola desegin: Nafarroako kasuen azalpena
Gaur egun gure hizkuntzak eta hizkuntz komunitateak duen egoera aztertzeko eta ulertzeko ezinbestekoa zaigu, besteak beste, oinarri historiko bat. Azken urteetako zenbait ikerlan oso lagungarri zaizkigu euskara mugatzeko eta komunitatea desegiteko egin diren saiakerak eta hartu diren neurriak ezagutzeko, eta urteetan zehar zailtasun hauetara nola egokitu garen jakiteko. Roldan Jimenok Nafarroako kasuaren hainbat erreferentzia eman dizkigu.
Koldo Izagirre	Donostiako euskararen historia ttipia
Zenbateraino zen euskalduna Gipuzkoako hiriburua mende honen hasieran? Nolakoa izan da euskaldunekiko erdaldunen jarrera Donostian? Azterketa zientifikoaren hoztasuna gaindituz, Koldo Izagirrek orain bi urte argitaraturiko lan ederrean bitxikeri eta datu ugari bildu zuen Donostiako euskararen historia ttipia osatzeko. Lan hau egilearen eskutik ezagutzeko parada izan dugu.
R. Jimeno, K. Izagirre, Erlantz Urtasun eta Imanol Esnaola	Galdera/erantzunak eta tertulia (gerora begirako ildoak, gaia nola landu...)
Nafarroako eta Donostiako kasuen inguruko azalpenen ondoren, gaiari buruzko hausnarketa tartetxo bat proposatzen dugu. Roldan Jimeno, Koldo Izagirre eta Imanol Esnaola mahai berean bilduta, horrelako azterketek zein ondoriotara garamatzaten eta aurrerantzean arlo honetan lehentasunak eta aukerak zein diren aztertzen saiatuko gara.
Herrietako plan estrategikoak eta hizkuntz bilakaera aztertzeko adierazle sistemak
Maite Gerenabarrena eta Helene Armentia	Berrizko eta Lezoko plan estrategikoak
Euskararen aldeko sustapen lanetan urrats berri bat emanaz, hainbat herritan Plan Estrategikoak jarri dira martxan. Plan hauetan hainbat agenteren lana uztartzen da herrian ahalik eta agenterik gehien aktibatzeko eta pausurik eraginkorrenak emateko. Saio honetan, modu praktiko batean Lezoko eta Berrizko plan estrategikoen berri izan dugu. Maite Gerenabarrena Berrizko euskara teknikariak eta Helene Armentia Elhuyarko hizkuntza teknikariak bi plan hauek nola antolatu diren eta zein urrats eman diren azaldu digute.
Iñigo Garaialde	Euskararen egoera diagnostikatzeko Kontseiluaren Neurgailua egitasmoa
Zein aldagai hartu kontuan herriko hizkuntz egoera zein den baloratzeko garaian? Azken urteetan aurrerapauso nabarmenak eman dira gai honetan eta, besteen artean, Kontseilua Neurgailua egitasmoa garatzen ari da. Egitasmoaren ardura duen Iñigo Garaialdek eman digu orain arte landutakoaren berri.
Ikerketa lan eta ekimen berriak
Iñaki Garcia	Euskararen erabileran eragiten duten prozesu psikosozialak: identitate etnolinguistikoaren garrantzia
Gaur egun, jakin badakigu, gaitasunaz gain, beste hainbat aldagaik eragiten dutela hizkuntzaren erabileran. Besteak beste, identitate etnolinguistikoak eragin nabarmena du guk hizkuntza ezberdinei buruz egiten dugun balorazioetan eta horrek aldi berean hizkuntza hauen erabileran. Iñaki Garciak gai honen inguruan egin duen ikerketaren emaitzak eta ondorioak azaldu dizkigu.
Nekane Arratibel	Helduen euskalduntzean eragiten duten prozesu psikosozialak: motibazioaren errola
Zein aldagaik eragiten dute gehien euskara ikasten hasteko erabakian? Eta euskara ikastera garamatzaten arrazoien arabera nola garatzen da ikasketa prozesua? Nekane Arratibelek motibazioak euskara ikasten ari direnengan duen eragina ikertu du eta bere ondorioen berri eman digu.
Paula Kasares	Hizkuntz Eskubideen Behatokia
Errespetatzen al dira euskaldunon hizkuntz eskubideak? Ezagutzen al ditugu eskubide hauek? Europako Hizkuntz Gutxituen legeak eskaintzen al digu aukera berririk? Badira hilabete batzuk Behatokia gai guzti hauek aztertzen, lantzen eta zabaltzen hasi dela. Bertako arduradun den Paula Kasaresek azaldu digu orain arte egindako lana zertan den, zein diren Behatokiaren egungo jarduera nagusiak eta zein izango diren lan ildo nagusiak aurrerantzean.