Web Eustat.

DENBORA NOLA ERABILI: LANERAKO DENBORA, AISIARAKO DENBORA ETA HAIEN ERAGINA GIZARTEAN

Zuzendaria: Prof. D. José Mª Agirre Eskisabel. Eustat. Vitoria-Gasteiz.

Helburuak: Jendeak eguneroko denbora banatzeari buruzko interesa pasa den mendeko hogeigarren hamarkadan zabaldu zen lehenbiziko aldiz, baina interes hori biderkatu egin da azken hamarkadetan. Hamaika dira herrialde ezberdinetan eta aldi desberdinetan ikergai horri buruz egin diren inkestak. EUSTATek egindako hirugarren inkestaren emaitzak lortu berri ditu, EAEn denbora nola erabiltzen den gaiaren ingurukoak, hain zuzen.

Zenbat denbora igarotzen dugu lanean, jaten, lotan? Zenbat denbora pasatzen dugu gure seme-alabekin, etxeko lanak egiten, telebista ikusten, lagunekin? Nola antolatzen dugu gure aisialdia? Galdera horiek guztiak eta beste horrenbeste sor daitezke egindako inkesten emaitzak bai denboran, bai espazioan alderatzean.

Alde batetik, garai ezberdinak alderatuko dira bizitzeko moduak eta pertsonen jarduera-motak nola aldatu diren eta zein motatako joerak izan diren ikertzeko. Bestetik, gure inguruko herrialde garatuetan bizi diren herritarren arteko jarrerak alderatuko dira.

Maila pertsonalaz gaindi, gizartean azaldu daitekeen eta azaldu behar den gaia da hau, eta gure artean ezarri den fenomeno berritzat hartu beharra daukagu; hau da, hiru zatitan banatutako bizi-ziklo bat: ikasteko denbora, gero eta denbora gehiago igarotzen da; lanerako denbora, gero eta beranduago hasi eta goizago bukatzen da; erretiro denbora, luzatu egiten da bizi-itxaropena gero eta handiagoa baita.

Nolanahi ere, denbora astean, urtean eta, oro har, bizitza osoan erabiltzeko modua ez da soilik irizpide kuantitatiboen arabera neurtuko; izan ere, bizitako denboraren kalitatea kontuan hartu behar da, bai lanean, bai gainontzeko zereginetan.