Hemen zaude: Hasiera CS-Tailerra CS-Tailerraren bloga Topics seo

seo

Search Congress Bilbon. Aldaketa garaian jarraitzen dugu

by Gari Araolaza — azken aldaketa 2010/02/01 10:00

Urtarrilaren 28 eta 29an Bilbon izan gara Search Congress Bilbao konbentzioan. Handik ekarri ditugun pare bat idea konpartitu nahi genituzke:

Zertaz izan da Search Congress hau?

Bilaketaz aritu gara, Interneteko bilaketaz. Gauza jakina da webguneetara datorren jendearen zati handiena bilatzaileetatik datorrela, edo agian bilatzailetik esan beharko genuke, hau da, San Googletik, gehienok horrekin gabiltzanez. Webgune askotan bisitarien %80 baino gehiago etortzen da bilatzaileetatik. Horregatik da hain garrantzitsua Googlen ondo kokatua egotea, emaitza jakin batekin lehena ateratzea eta bide horretatik bisita asko jasotzea. Horren inguruan jardun dugu kongresu honetan, estatu guztitik etorritako 300 bat SEO profesionalen artean.

Zer da SEO bat?

SEO, Search Engine Optimizer edo Optimization, edo bilatzaileetarako optimizatzailea, azken urteotan webgune askotan lanean hasi diren profesionalak dira. Beraien lana, webgunea zaintzea, Googleren lehen emaitzetan azal daitezen.

Nola egiten duten lana? Modu askotan: testuak moldatuz, teknikoki webguneak txukun mantenduz, neurketak eginez, sare sozialetan webgunea bultzatuz eta beste lan askotan jardunez, horietako asko sekretuak, konpetentzia handia bait dago SEO profesionalen artean. Gaur egun trafiko ertain batetik gorako edozein webgunek du SEO profesional bat lanean.

SEO-aren hurrengo pausoa: azpiegiturak omen dira

Ostegunean Javier Casares-en hitzaldian egon ginen: El próximo SEO: la infraestructura

Javierren teoria da gaur egun gehienok gauzak ongi egiten ditugula SEO aldetik. Orduan, desberdintzeko hurrengo pausoaren bila jarraitu behar dugula, eta hurrengo pausoa beretzat, abiadura eta perfekzio teknikoa dela. Hau da, zerbitzariak ongi konfiguratzea, webguneak azkar erantzutea, redirekziorik ez edukitzea eta abar. Hainbeste sinesten du gai honetan, bere datacenter propioa sortzen hasi dela!

Hor badugu zer hobetu gehienok. Merezi du Javierren aurkezpena ikustea, informazio gehiena hor dago, bere webgunean jarrita.

Aldaketak SEO munduan: Real-time Search

Kongresuan entzundako gai interesgarriena, SEOen hurrengo erronka Real-time Search edo denbora errealeko bilaketa izango da. (Egia esateko, noiz ez da aldaketa garaia izan Internet munduan?)

Lehen zerbait bilatu eta Googlek emaitza berdinak ematen zituen gaur, bihar, etzi edo datorren astean. Baina gaur egun faktore askok eragiten du bilaketa emaitza batean:

  • Norberaren preferentziak edo aurretik egindako bilaketak edo izandako jokaera Googlen.
  • Webgune berriak. Google geroz eta azkarrago eguneratzen da, eta gaur ezagutzen ez genuen webgune bat ager daiteke bihar emaitzen lehenengo postuetan.
  • Twitter, sare sozialak, albisteak eta beste aktualitateko iturriak integratzen hasi da Google eta kontutan hartzen ditu webgune bat aipatzen dutenean.

Ziurtasun eza sentitzen da SEOen munduan, artifizialki lehenengo postuetan azaltzea geroz eta zailagoa izango bait da.

SEO: oraindik elite baten kontu bat

Baina bestalde, esan daiteke SEO kontu hauekin dabiltzan profesionalak nolabaiteko elite bat osatzen dutela. Etxe alboko informatika enpresa jeneralista horrek webgune bat egiten duenean normalean ez ditu gai hauek kontutan izaten, eta hor ere aldea nabari da.

Beraz, webgune bat egin behar baduzu, pentsatu SEOan eta galdetu horren inguruan zure konfidantzako garatzaileari.

Hitz gakoen analisia

by Mikel Lizarralde — azken aldaketa 2009/03/13 13:49
Etiketak:

Posizionamendu edota SEO lana hastean lehen pausuetariko bat webgunearentzako zein hitz gako diren interesgarrienak aztertzea da. Hitz gako horiek bilatzen direnean lehen postuetan agertzea izango da gure helburua.

Hartu ezazu orri zuri bat eta idatzi zurearen tankerako webguneetara iristeko bezeroek Google-en bilatu behar lituzketen hitz edota esaldiak. Beste aukera bat, lehiakideen webguneak aztertzea da, ea zein hitz gako darabilten ikusteko.

Hitz gakoen zerrenda egin ostean, hauetatik erabilienak zeintzuk diren jakin behar dugu, hau da, gure webgunera jende gehien ekarriko dituztenak.  Horretarako Google Keyword Tool erreminta erabil daiteke.

Hala ere, ezin ditugu baztertu trafiko gutxi ekar ditzaketen hitz gako horiek, litekeena da garrantzitsuagoak izatea gure negoziorako eta emaitza hobeak eman ditzakete beste hitz gako batzuek baino (adibidez, benetan interesa daukan trafiko segmentatua badakarte). Hitz gako hauek aukeratzeko prozesu hau funtsezkoa da posizionamendua egiteko, baina baita Google-en Adwords iragarkiak kontratatu nahi izanez gero ere.

Posizionamendu lana burutu ostean, edota Adwords iragarkiak kontratatu ostean, funtsezkoa da emaitzak neurtzea. Horrela jakin ahal izango dugu zein hitz gakok ematen diguten trafikorik onena eta zein hitz gakorekin saltzen dugun gehien (hori bada gure helburua). Analisi honi esker gure hitz gako zerrenda moldatu beharko genuke, terminu batzuk kenduz eta beste batzuk gehituz.

Oinarrizko posizionamendu gomendioak

by Mikel Lizarralde — azken aldaketa 2009/03/04 11:10
Etiketak:

Google-ek SEO edota posizionamenduaren inguruko oinarrizko gida bat argitaratu zuen azaroan.

Jende gutxik jartzen du zalantzan posizionamendua zein garrantzitsua den gure webguneentzako. Hauxek dira, labur-labur, Google-ek argitaratutako gidan aipatzen diren puntuak:

  • Webgunearen izenburua (title etiketa): sortu izenburu deskriptibo eta laburrak, gomendagarria da webgunearen orri bakoitzarentzari izenburu propioa jartzea. Ondo kokatzeaz gain, gogoan izan bilatzaileen emaitzetan jendeak ikusten duen lehen gauza webgunearen izenburua dela, erakargarria izan behar dira, beraz.
  • Deskribapena (description etiketa): labur eta era deskriptiboan azaldu zure webgunea. Bilatzaileen emaitzetan, izenburuaren azpian agertzen da deskribapena.
  • Webgunearen URL-a (nabegatzailean idazten dugun helbidea): hitz gakoak agertu behar dira bertan, era laburrean bada hobe. Hobe da gure webgune honen moduko URL helbide ulergarriak izatea.
  • Webgunearen nabigazioa: ezar ezazu zure webgunean erabiltzaileek ulertzeko moduko nabigazioa. Erabili kategoria izen deskriptibo eta zentzuzkoak. Gomendagarria da menu nagusian Flash edota JavaScript-ik ez egotea. Breadcrumb-ak (ogi apurrak) erabiltzea gomendagarria da baita ere. Webgunearen mapa edukitzea eta 404 orri erabilgarriak diseinatzea ere garrantzitsua da.
  • Kalitatezko edukia eskaini: pentsa ezazu zure erabiltzaileengan eta eskaini beraiek nahi duten edukia, idatzi beraiengan pentsatzen eta ez bilatzaileengan.
  • Loturak ondo egin: gai honen inguruan, hobe Gariren Nola egin loturak artikulua irakurtzen baduzue.
  • Orrien goiburu etiketak era egokian erabili (h1 eta h2 etiketak): Eskema moduan, erabiltzailea orrian kokatzeko baliagarriak dira, baina orri bakarrean ez da abusatu behar.
  • Argazkiak era egokian landu: Argazki bat webgunera igotzean, jarri izenburu egokia, bilatzaileek asko baloratzen dute.

Gomendio gehiago aipatzen dituzte. Hemen ikus dezakezu gaztelaniazko artikulua eta hemendik jaitsi gomendioen PDF-a.

Azkarra da zure webgunea?

by Gari Araolaza — azken aldaketa 2009/02/06 11:54
Etiketak:

Zure webgunearen abiadura hobetzeko tresnak.

Askotan ez gara konturatzen zein garrantzitsua den gure webgunea azkarra izatea. Oraindik badugu zer ikasi. Errementariaren etxean...

Aste honetan Microsiervoek ekarri digute gaiaren inguruko erreferentzia bat: En las páginas web, ser rápido importa . Kontua da, askok ez dituztela jadanik segunduak neurtzen, milisegunduak baizik!

Neurketak modu askotan egin daitezke, eta komeni da ahalik eta neutroena izatea, sarritan kanpoko interferentziak izaten dira eta (gure sarearen abiadura, jende asko dabilen ordu berdinean eta abar)

Pare bat aplikazio interesgarri aipatzekotan, hor dauzkazue Firebug edo YSlow! , biak Firefoxen gehigarriak eta biek lagunduko dizute zer gertatzen den aztertu eta hobetzen.

Baina tresna neutroetaz ari garela, zer hobe Google beraren robota baino, egunero zure webgunera sartu eta orri asko deskargatzen dituena? Horretarako oso egokia da Google Webmaster Tools . Tresna hori erabiliz lortu daitezke hau bezalako grafikoak, non Googlek esaten digun zenbat denboraz egon den gure webgunea deskargatzeko zai, milisegundutan emana.

Itxura batean hobetzen goaz, ez?

 

Website performance 2009/1/4

Bilaketen buztan luzea

by Josu Azpillaga — azken aldaketa 2009/01/08 09:26
Etiketak:

Google Analitycs-eko Avinash Kaushik ingeniariak datu interesgarria eman omen zuen Atlantan egindako ebentu batean. Googlen gero eta bilaketa zehatzagoak egiten ditu jendeak. Gaur egun, lehen aldiz, 4 hitzetako testuak bilatzen dira bataz-beste bilatzaile erraldoi horretan.

Hau da, jendeak ez du bilatzen "eibar". Bilatzen du, adibidez, "guardiako farmazia eibarren ", "mapa eibar plaza untzaga", "eibar kirol-denda ordutegia"... eta abar. Bataz beste 4 hitzetako "esaldiak" (esaldi baino, "hitz multzoak").

Nonbait hitz bakarra jarrita lortzen diren emaitzek ez gaituzte asebetetzen. Chris Andersonen buztan-luzea, bilaketetara ere iritsi dela dirudi, honenbestez.



"Kirol-denda eibarren", "farmazia eibar untzaga" eta antzeko konbinazio bakoitza, 2-3 lagunek bilatuko dute soilik hilabetean. "Eibar", aldiz, 2000 lagunek. Baina 3-4 hitzetako hitzen konbinazio posible guztiak hainbeste dira, denen artean, "eibar" berak baino pisu haundiago hartzen dutela.

Eta horrek asko zabaltzen edo zailtzen du SEO (Search Engine Optimization) burruka.

Zure webguneko keyword edo hitz-klabeak identifikatu eta haiek ondo posizionatzen saiatu zintezke -eta hori egin behar da, noski-, baina ezin dituztu hitz konbinazio posible guztiak aurreikusi eta kontuan hartu. Nola kokatzen da webgune bat ondo horrelako bilaketa konkretuen emaitzetan? Nola lortzen dut "guardiako farmaziak eibarren" esaldia bilatzen duenari ttak, nire orria azaltzea (besteak beste horretaz ari delako)? "Guardiako farmaziak eibarren" hitzak eduki beharko ditu, bai, baina ordena, barianteak... aukerak mila dira. Batek bilatuko du "guardiako farmaziak eibarren gaur", "guardia farmazia eibar"... Eta ez da euskarazko deklinazio arazoa soilik, horrek guri zailtasun extra bat suposatzen digun arren. Beste hizkuntzetan ere barianteak mila dira. Auskalo zer jarriko duen jendeak galdera hori egiteko!

Ez dut uste truko handirik dagoenik. Bi aholku soilik emango nituzke:

  1. Edukia sartu. Edukia, edukia, edukia. Sartu eduki interesgarria zure orrian. Printzipioz interesik ez duela iruditzen zaizun artikulu, esperientzia... hori ere sartu zure orrian. Bilaketa arraroa egiten duen norbait erakarriko duzu, agian, horrekin. Buztan luzeko bilaketak lortzeko, blog eta sarri eguneratzen diren webguneak oso interesgarriak dira. Dendari eta enpresei esaten diet: kontatu zure esperientziak hor, idatzi, idatzi, idatzi. Ondo idatzi eta gauza interesgarriak kontatuz gero, hobe, jakina.
  2. Egin orria estandarrei jarraituz eta SEO agindu minimo batzuk kontuan hartuz. Webgunea egiterako izan hori kontuan. Bezeroari zure orria gehiago edo gutxiago gustatuko zaio, baina benetako epaia Googlek emango dizu.
Bi agindu hoiek betez gero, egon seguru, uste ez dituzun bilaketak egindako jendea iritsiko da zure webgunera. Gero, zurean geratuko den edo zure intereseko zerbait (erosi, informazio eskatu...) egingo duen... hori beste kontu bat da.

Bilatzaileetako urrezko triangelua

by Mikel Lizarralde — azken aldaketa 2008/10/24 17:50
Etiketak:

Orokorrean bilatzaileetatik jasotzen dute webgune gehienek bisitarien portzentai handiena. Horregatik da garrantzitsua webgunearentzat interesgarriak diren bilaketa terminuetan ondo kokatua egotea.

Bilatzaileetan ondo kokatua, ondo posizionatua, egoteko egiten den lanari ingelesez SEO (Search Engine Optimization) esaten zaio (beste hainbat terminu ere erabiltzen dituzte zenbaitzuk, baina hobe ez nahastea).

Posizionamendua zein garrantzitsua den azaltzeko nahikoa da "urrezko triangelua" zer den kontatzea. Bilatzaileetako emaitzei nola begiratzen diegun ikertu zuen Eyetools enpresak, begien mugimendua aztertzen. Konturatu ziren jende gehienak triangelu formako eremu batean jartzen zuela arreta. Begira irudiari:

SEO - Golden triangle

Kuriosoa da emaitza naturalak eta iragarkiak zenbat jendek ikusi dituen jakitea.

Emaitza naturalak

Lehen emaitza: %100

Bigarrena: %100

Hirugarrena: %100

Laugarrena: %85

Bostgarrena: %60

Seigarrena: %50

Zazpigarrena: %50

Zortzigarrena: %30

Bederatzigarrena: %30

Hamargarrena: %20

Iragarkiak

Lehen iragarkia: %50

Bigarrena: %40

Hirugarrena: %30

Laugarrena: %20

Bostgarrena: %10

Seigarrena: %10

Zazpigarrena: %10

Zortzigarrena: %10

Ondorioak

Zure enpresa edo erakundearentzat Internet funtsezkoa bada bezeroen arreta lortzeko, hobe duzu posizionamendua ondo lantzea, bestela jai daukazu!

Iturria Ismael El-Qudsi (gazteleraz)

 

Eguneraketa (2008/10/30)

Begira ondorengo irudi honi, aurreko kasuan bezala Google-en emaitza orri bat da:

SERP click

Internautek emaitza bakoitzari emandako klik portzentaia eta denbora agertzen zaigu bertan. Lehen postuen garrantziaz gain, interesgarria da ikustea hobe dela 10. agertzea 7.a baino.