Xabier Lete euskal poeta, kantari eta ohorezko euskaltzaina hil zen atzo, abenduaren 4an, 66 urte zituela. Haren aldeko hileta-elizkizuna asteartean, hilaren 7an, izango da, Urnietako elizan.

Xabier Lete Oiartzunen jaio zen. Idazle, poeta eta kantari  izan da. Ez dok Amairu taldea sortu zuenetariko bat izan zen. 1975etik 1978ra Antton Valverderekin kantatzen aritu zen, eta bertso zaharren bertsio berriekin bi disko atera zituzten, Lizardiren poesiei eta Txirritaren bertsoei eskainiak. Antzerkia ere jorratu zuen, eta euskal teatro modernoaren oinarriak finkatzeko asmoak bultzaturik, Eugenio Arozenarekin kolaboratu zuen. Kolaborazio horretatik sorturiko obrak Oiartzungo Intxitxu antzerki taldeak antzeztu zituen.

Besteak beste, poema liburu hauek idatzi ditu: Egunetik egunera orduen gurpillean, Bigarren poema liburua, Urrats desbideratuak, Biziaren ikurrak, Zentzu antzaldatuen poemategia, Abestitzak eta poema kantatuak, Egunsentiaren esku izoztuak, bere azken lana. Liburu honekin irabazi zituen Euskadi Literatur Saria eta Espainiako Kritikaren Saria.

Diskoen artean, hauek: Errota zahar maitea, Nafarroa arragoa, Kantatzera noazu, Lore bat, zauri bat , Eskeintza, Hurbil iragana. Hainbat abeslarik musikatu eta kantatu izan dituzte Leteren olerkiak eta kantak, horien artean Mikel Laboa, Lourdes Iriondo, Antton Valverde, Imanol Larzabal edota Benito Lertxundi daudelarik.

Urtero bezala, aurten ere Durangoko Euskal Liburu eta Disko Azokan izango da Euskaltzaindia. Gaurtik 8ra bitartean izango den Azokan, salmahaia jarri du Akademiak eta urte osoan argitaratutako liburuak izango ditu salgai. Gainera, Euskera agerkari ofizialak 90 urte bete ditu aurten, eta urteurrena ospatzen ari da Akademia.

Bestalde, Euskera Euskaltzaindiaren agerkari ofiziala eraberritua plazaratu da. Urteko hiru zenbakiak -lau liburukitan jasoak- kalean dira.

Argitalpen zerrenda guztia ikusteko sakatu gehiago irakurri estekaren gainean.

Bestalde, urtarriletik uztailera bitarteko argitalpenak ikusteko sakatu hemen.

Gaur, iluntzeko 19:00etan, Bilbo Zaharra Forumek antolatzen dituen "Hitza eta musika" jardunaldien barruan, Erlea aldizkariaren irakurleen saioa egingo da, Euskaltzaindiaren egoitzan. Bernardo Atxagaren zuzendaritzapean, Euskaltzaindiak argitaratzen duen aldizkari honen hirugarren zenbakia azaroan aurkeztu zen, eta aurkezpenean bertan Asteasuko idazle eta euskaltzainak proiektu honen berri eman zuen. Berak esan bezala, irakurleen saioak izeneko iniziatibaren bitartez, irakurleak eta aldizkarian parte hartu dutenak bildu nahi dira, eta guztien arteko harreman zuzenak bideratu.

Gaurkoa izango da lehen saioa, eta Atxagarekin batera Andres Urrutia, Pedro Alberdi eta aldizkarian parte hartu duten hainbat sortzaile izango dira. Datorren urtean saio gehiago egingo dira.

Erlea aldizkariaren azken zenbakiaren atmosfera nagusiak Afrikara garamatza, Aljeria eta Magreb protagonista direlarik. Ipar Euskal Herriari ere ahotsa ematen dio Erleak, eta aldizkarian agertzen diren hainbat idazlek -Piarres Aintziartek, Jean-Louis Davantek, Txomin Peillenek- bi errealitate horiek, Iparralde eta Aljeria, lotzen dituzte. Bestalde,  Mohamed Xukri, Joseba Sarrionandia edota Vicente Ameztoy dira protagonista zenbaki honetan, besteren artean.