Markel Olano Arrese

Joan den asteartean Andoaingo saihesbidea ireki genuen, hainbat hilabetetako lanak amaitu ondoren. Andoaingo zatian ere lau karrileko errepidea irekita, Urumeako 14 kilometroko autobidea osatuta geratu da. Orain Hernaniko 3,5 kilometroko zatia desdoblatzea baino ez da falta guztiz osatuta gera dadin, baina lanak doazen martxa ikusita, espero dut 2013an irekitzeko moduan izango dela. Benetan pozgarria da legealdi amaierara Gipuzkoako bide-sarean benetako iraultza gertatu dela ikusita iritsi izana. Are gehiago, kontuan hartzen badugu legealdi hasierako Plan Estrategikoan jaso genuen zazpi helburuetako lehenak zer zioen: Gipuzkoako errepide sarea prestatzea eta mugikortasun-sistema aurreratu bat garatzea. Uste dut helburu hori lortzeko bidean egindakoaz kontuak emateko moduan garela.

Gipuzkoako “biribilgunea” deitu diogun kontzeptuarekin, legealdi honetan Gipuzkoako Foru Aldundian berebiziko apustua egin dugu lurraldeko bide-azpiegiturak garatzeko. Guztira errepideeetan 100 kilometro berri egitea edo eraberritzea esan nahi du Gipuzkoako rotonda osatzeak eta horrek esfortzu ekonomikoa ere handia eskatu digu gipuzkoarroi (2.000 milioi eurotik gorako inbertsio-ahalegina). Baina horrek guztiak badu helburu bat: erabiltzaileen bide-kalitatea hobetzea, enpresen lehiakortasuna areagotzea eta Gipuzkoak duen lurralde-oreka sakontzea.

Legealdi honetan bide-azpiegituren arloan asko aurreratu du gure lurraldeak:

• 2009ko udaberrian Araba eta Gipuzkoa gerturatu dituen AP-1 (Eibar-Gasteiz) errepidea ireki genuen. Bi lurraldeak gerturatzeaz gain, Deba bailarako komunikazioa asko hobetu da eta N-1 errepideko trafikoa arintzen lagundu du.
• Donostiako bigarren ingurabidea ere iraultza handia izan da Donostialdearentzat. Donostiako saihesbidetik kamioiak atera ditu eta orain 10.000 kamioi gutxiago dabiltza saihesbidea horretan.
• Aste honetan zati guztiak osatuta geratu den Urumeako autobidea ere garrantzitsua da Gipuzkoako errepide iraultzan. Donostia erdialderaino sartu da Urumeako autobidea eta gainera, Andoain eta Donostia artean N-1aren alternatiba bihurtu da.
• Beasain-Bergara ardatzean aurrerapausoak eman dira. N-1 eta AP-1 lotzeko lanetan, Zumarraga pareko saihesbidea amaitzear da eta Deskargako zatia tunel baten bitartez gaindituko da.

Hauez gain, beste hainbat errepide egin eta hobetu dira gure lurraldean azken lau urteotan. Beste batzuk hobetze edo eraikitze lanetan daude (Martutene-Ospitaleak konexioa adibidez). Ez da nire helburua denak aipatuz bloga betetzea eta irakurleak aspertzea, baina bai azpimarratzea bide-azpiegituretan gipuzkoar guztiok egindako ahalegin ekonomikoa gure lurraldearen onerako dela, bai orain eta bai etorkizunean.