Itzuli orri nagusira Bidali hau

Hizkuntza-kudeaketa enpresan "30+10" mintegiko balorazioa

© cc-by-sa  IMH ¦ 2011-12-24 ¦ 10:50 ¦ enpresa

Enpresen hizkuntza kudeaketari buruzko 30+10 Mintegia izena duen jardunaldia azaroaren 17an burutu zen Elgoibarko Makina-Erremintaren Institutuan. Jardunaldi hori IMHk berak antolatzen du, Ahize-AEK hizkuntza aholkularitzaren laguntzarekin. Aurtengoa seigarrena izan da Hona hemen mintegiko bideoa eta balorazioa. **(bideoak ikusteko hemen...)**

Publizitatea

30+10 Mintegiaren antolaketak Elgoibarko udala eta beste bi instituzioren babesa jasotzen du, eta era berean, haien ekarpenak ere egiten dituzte. Aurtengoan, alde batetik, Eusko jaurlaritzak Bikain eta Bai Euskarari ziurtagirien artean proiektu bat gauzatzeko akordioa iragarri zuen. Bestetik, Gipuzkoako Foru Aldundiak legegintzaldi honetarako lan ildoak aurkeztu zituen. Besteak beste, zerga-neurrien bitartez, enpresetan euskara planak ezartzea bultzatzeko asmoa.

Aurreneko aldiz, gonbidatutako herrialde bat izan zen: Txina. Hango egoera sozial, ekonomikoa eta linguistikoa aztertzeko bi hitzaldi izan ziren (Interbasque eta Gipuzkoako txinera institutua) Nabarmen geratu zen komeni dela bertako bazkide batekin elkarlanean aritzea eta bertako hizkuntza ikastea (oro har, Txinako herritarrek ingeles gutxi hitz egiten dute, eta ez du ematen aldaketa handirik emango denik).

Ponentzia horiek ematen ari ziren aldi berean, AnbotoGroupen kasua aurkeztu zen. Interesgarria izan zen entzutea Silicon Valleyn ezarrita dagoen Erandioko enpresako CEO gaztea azaltzen nola jokatu behar duen merkatu globalean lan egin nahi duen ekintzaile batek. Jarreraren eta konplexuak gainditzearen garrantzia azpimarratu zituen. Haren iritziz teknologia ona dugu; saltzen ikastea falta zaigu.

Jarraian, partehartzaileek hobekien baloratutako hitzaldia izan zen. Responsabilitat Globaleko sustatzaileak aurkeztu zituen bere proposamenak hizkuntza kudeaketa enpresen erantzukizun sozialean txertatzeko.

Ondorengo mahai inguruan, aipatuta hizlariez gain, CONFEBASKeko idazkari nagusia eta Gipuzkoako berrikuntza diputatuak hartu zuten parte. Hizkuntza kudeaketaren gaineko bi iritzi desberdin nabarmendu ziren. Zenbaitek lehentasun nagusia ematen zioten enpresek dirua irabazteari, eta hizkuntza kudeaketa xede hori merkatu berrietan lortzeko beste tresna bat baino ez da. Beste zenbaitek, aldiz, uste dute enpresak asebete behar dituela bere jarduerak eragindako inguruetako interes taldeek ezarritako gutxieneko batzuk ere.

Bi jarrerek hizkuntza kudeaketaren alde egiten dute, baina batzuek euskara aberastasun kultural gisa ikusten dute, ez negozioetarako, eta, besteek, aldiz, erantzukizunaz hitz egiten dute eta eragindako kultura aldaketak enpresari itzultzen dion onuraz.

Agerian geratu ziren lurralde honetan dugun aniztasuna sistematikoki kudeatzeko dugun zailtasuna; esaterako, D ereduko ikasleei lantokiko praktiketan instruktore euskaldunak bermatzerakoan.

Arratsaldeko txanda bi hitzaldik abiatu zuten: bata, Emun aholkularitzarena, enpresek sarea linguistikoki nola kudeatzen duten ikertzen duena; eta, bestea, Elekaren Idazlagun erremintari buruzkoa.

Ondoren, bigarren mahai ingurua burutu zen, lidergoa eta asertibotasun linguistikoari buruz. Topagunea eta lau aholkularitzek parte hartu zuten (Emun, Elhuyar, Artez, Topagunea eta Ahize-AEK). Pertsonaren alderdi psikologikoa lantzeak duen garrantziaz aritu ziren, baina beti ere talde-ikuspegia galdu gabe, eta arlo hori lantzen duten produktu batzuen aipamen laburra egin zen. (TELP, Eman bostekoa, Aritu.eu eta eusLiderrak). Jardunaldia amaitzeko, parte hartzaileen arteko "kekako" getting-contacta burutu zen.

Entzuleen kopuruari erreparatuta, jardunaldia finkatuta dago. Guztira 94 lagun bertakotu dira eta beste 47k internet bidez jarraitu dute. Ohiko entzule fidelez gain, %15 izan dira etorritako parte hartzaile berriak.

Kualitatiboki ere garrantzitsua izan da. Landutako gaiekin lotura duten instituzio, erakunde eta enpresa garrantzitsuenetako ordezkariek hartu dute parte. Aurretik aipatutakoez gain: Soraluzeko udala; CCOO eta hizkuntzak kudeatzen ari diren enpresa garrantzitsuenetako batzuk (Elay, Batz, CAF, Orkli, Danobat, Goratu, Urkotronik, Kutxa, UZEI, ILS, Dualia); Tasfor aholkularitza eta Tekniker eta Ekai center ikerketa zentroak; hizkuntzen industria biltzen duen Langune klusterra; Bikain eta Bai Euskarari ziurtagiriak; hizkuntzen erabilera eta irakaskuntzari lotutako enpresa eta erakundeak (Topagunea, AEK, Banaiz bagara elkartea, EIZIE, Elgoibarko udala euskaltegia eta Eta kitto! Euskara elkartea); eta formakuntzari lotutako erakunde eta ikastetxeak (Gabriel Aresti, Meka, HUHEZI, La Salle, Lekeitioko institutua, Eibarko Berritzegunea eta Laneki).

Urtebete barru izango da hurrengo hitzordua. Data iritsi arte, denbora dugu aurrera egiteko, hizkuntzak pasa daitezen batzuen bihotz eta poltsikoetan bakarrik egotetik, guztion buruan egotera. Gure enpresek eskertuko dute, mundu osoan zabaltzen ari den eskaera bati hobeto erantzuteko gai izango direlako. Eta etorkizuneko belaunaldiek ere eskertuko dute, planetak duen hizkuntza eta kultura aniztasuna ezagutzeko aukera izango dutelako.

Erantzun (klik zabaltzeko)

Publizitatea

 Nabigatu euskaraz