Nik ere babesten dut Dantzan.com: lagun ezazu euskal dantzari buruzko gune hau bizirik mantentzen
Krisi ekonomikoa dela eta, Dantzan.com webguneak itxi egin behar izan zuen iaz, baina irakurleek eginiko kanpainari esker, diru iturri eta laguntza berriak eskuratu zituen eta berriz ere ireki zen. Alta, arazoak ez dira amaitu eta webguneak diru iturri berriak behar ditu martxan jarraitzeko, orduan jaso zuen laguntza hura ez delako nahikoa. Gauzak horrela, Dantzan.com-eko zaleek sostenguekonomikoa emateko babesle-taldea sortzea erabaki dute. Munduko euskal dantzarien bilgune birtual honek aurrera egitea nahi baduzu, egin zaitez zu ere babesle!
Euskal dantzari buruzko liburua euskaraz eta frantsesez doan sarean, Etxepare eta EKEri esker
Etxepare Euskal Institutuak eta Iparraldeko Euskal Kultur Erakundeak indarrak batu egin dituzte Oier Araolazak idatzitako "Euskal Dantza" dibulgazio liburua euskaraz, frantsesez eta ingelesez eskaintzeko. Etxeparek iaz argitaratu zuen lana, Euskal Kultura sailaren barruan, baina ordukoa euskara-gaztelania-ingelesa bertsio hirueleduna zen. EKEren lankidetzarekin liburua frantsera itzuli da. Datozen hilabeteetan Euskal Kultura saileko beste zenbait lan ere argitaratuko dira frantsesez.
Montevideoko Eusko Indarrak 400 ikusle bildu zituen 30. urteurreneko bere ikuskizunera
Eusko Indarra dantza talde euskal uruguaitarrak 30 urte bete ditu aurten eta urteurrena ospatzeko ikuskizun berezia eskaini zuen iragan urriaren 17an Montevideoko antzoki batean. Nahiz eta asteazkena izan, ikusle andana hurbildu zen bertara --400 lagundik gora-- Eusko Indarraren dantza erakustaldiaz gozatzeko. Taulagainean 56 dantzari aritu ziren, adin guztietakoak; eta Txindurri folk talde euskal-uruguaitarrak jarri zuen zuzeneko musika.
Oier Araolaza, Dantzan.com: "Bada garaia Euskal Herritik Diasporako dantzariei begira hasteko"
Pozik da Oier Araolaza, Dantzan.com sustatzaileetako bat, webgune honen itzulerarekin, eta batez ere, itzulera hori posible egin duen sostengu kanpainarekin. Euskal Herriko dantza talde eta dantzariez gain, Diasporakoek ere parte hartu dute kanpainan eta Zortzigarren Herrialdea delakoak dantza munduari egin dion ekarpena aipatzen du: "Hemen galtzen ari diren gauza batzuk Diasporan ari dira mantentzen eta badira han hemengoak bezain gogotsu eta zorrotzak diren taldeak. Haiek hona begira izan dira beti, baina agian bada garaia Euskal Herritik ere hara begira hasteko".
Bueltan da Dantzan.com, nazioarteko sostengu-kanpaina bati esker erakundeen laguntza eskuratu ostean
Hilaren 1ean sarera bueltatu zen Dantzan.com webgunea, azken urteetan mundu osoko euskal dantza taldeentzat erreferente eta topaleku bihurtu den orria. Urte hasieran Dantzan.com-eko arduradunek webgunea itxi egin behar izan zuten, erakundeen laguntzen murrizketa dela eta. Orain, dantza munduak bultzaturiko sostengu-kanpainari esker erakundeen laguntza lortu du, baina webgunea berriz martxan jarri ahal izateko adina baino ez da, eta ez da nahikoa epe luzerako. Laguntza kanpainak indarrean dirau eta datozen asteetan ekimen berriak iragarriko dira.
Kukai konpainiak euskal dantza garaikidea erakutsi zuen Quebec-en, Montrealeko karriketan
Kukai dantza konpainia Quebec-en izan zen irailaren 11tik 14era eta Montreal hirian hainbat ikuskizun eman zituzten taldeko lau kidek. Jon Maia dantzari eta koreografoak zuzentzen du Kukai eta taldea euskal tradizioa dantza garaikideekin uztartzen eta berritzen ahalegintzen da. Quebec-era Montrealeko Festival Quartiers Danses jaialdiak gonbidatuta etorri zen taldea eta Euskaldunak Euskal Etxeko kide asko lagun izan zituzten emanaldietan (dantzarien hitzak frantsera itzultzen aritu ziren, gainera).
Hirugarren erromeria igande honetan, Urkiolan, 'Oinak kantuz' disko berria aurkezten duen Aiko taldearen eskutik
Euskal ohiko erromeriarako deia egin da igande honetarako Urkiolako santutegiaren ingurura, hain zuzen ere datorren asteko larunbatean, ekainaren 23an, San Juan bezperan, Durangon egingo den Dantzari Egunerako bidea prestatuz. Aurkeztu eta hezurmamitu eta praktikoki bideratuko dena ohiko moldeko dantzazaletasuna izango da, kasu honetan fruitu zahar/berri bat medio, ekitaldia antolatu duen Aiko Taldeak bere azken diskoa, 'Oinak kantuz' izenekoa, aireratu eta dantzagai ipiniko baitu. Helburua, jendeari dantzatzeko aukera ematea, 'betiko' aire eta moldeak lagun.
Cañuelaseko Denak Bat-ek apirilaren 14 eta 15era aldatu du Dantzarien Aberri Eguneko VI. Elkarretaratzea
Cañuelaseko Euskal Etxeak urtero Aberri Eguna ospatzeko antolatzen duen Dantzarien Elkarretaratzea Argentinako euskal egutegian marra gorriz markatuta dagoen horietakoa da, hitzordu garrantzitsua bilakatu baita azken urteotan herrialde honetako hainbat euskal etxetako dantzari batez ere gazteentzat. Seigarren edizioa du aurtengoa eta, lehenengo deian, martxoaren 31 eta apirilaren 1eko astebururako iragarri bazen ere, euskal etxe antolatzailetik atzo adierazi zutenez, apirilaren 14 eta 15era pasatu da azkenean, "ostatatzeko kontuak medio, horretarako erabili ohi dituzten Smata-ko instalazioak hasieran aipatutako datetan ez baitira egoki erabiltzeko moduan egongo".
Dantzan.com webgunea berriz abian jartzeko sostengu kanpaina hasi da: sina ezazu ostirala baino lehen
Berri txar batekin bukatu zuten urtea mundu osoko euskal dantzazaleek: www.dantzan.com webgunearen itxiera. Diru laguntza ekonomikoen murrizketak eta, zenbait kasutan, laguntzen desagerpenak, egoera jasanezinean jarri zuen Dantzan.com-eko lantaldea eta hamar urteko ibilbideari bukaera ekarri zuen. Sarean berehalako erantzuna izan du berriak eta irakurleek sortu duten sostengu talde batek webguneari laguntzeko sinadura-bilketa jarri du abian. Dantzan.com-eko arduradunak erakundeekin hizketan ari dira eta, munduan zehar duten sostengua erakusteko, ostirala bitartean jasotzen diren sinadurak aurkeztuko dituzte. Lagundu nahi baduzu, sina ezazu lehenbailehen!
Bihar hasiko da Euskal Koreografoen Berlingo 2. Jaialdia: dantza, poesia eta dokumentalak
Dena prest da Berlinen bihar hasiko den Euskal Koreografoen 2. Jaialdirako. Asteburuan zehar Euskal Herriko dantzari eta dantza konpainien azken proposamenak izango dira ikusgai Alemaniako hiriburuan; baina jaialdia hori baino gehiago izango da: poesia ere izango da, Itxaro Borda eta Edorta Jimenezekin; eta zinemak ere bere tartea izango du, 'Apaizak obeto' eta 'Modernist Basque surfing' dokumentalen emanaldiarekin. Mikel Aristegui dantzari donostiarra da jaialdiaren antolatzaileetako bat eta Berlingo Euskal Etxeak ere laguntzen du ekitaldia.