Hemen zaude: Hasiera Albisteak Euskararen Egunak kolorez jantzi zituen Londresko Trafalgar Square, Boise, Sydney, Bordele, Montevideo...

Euskararen Egunak kolorez jantzi zituen Londresko Trafalgar Square, Boise, Sydney, Bordele, Montevideo...

Apurka apurka ari dira geurera heltzen munduan zehar euskaldunek Euskararen Nazioarteko Eguna ospatzeko egin zituzten ekitaldien berriak eta argazkiak. Londresen, adibidez, London Basque Society elkarteak National Gallery museo ospetsuaren eskaileretan grabatu zuen euskararen aldeko bideoa, Sydney-en Gure Txoko elkarteak bazkari jendetsua egin zuen -tiketak agortu egin ziren- eta Boiseko euskaldunak herriko tabernetan kantuan ibili ziren. Jarraian, ekitaldi hauetako eta beste batzuetako bideo eta argazki kronika.

Donostia-San Sebastián. Munduko hainbat bazterretan izan zuen oihartzuna Euskararen Nazioarteko Egunak, Diasporako euskaldunek antolaturiko ekitaldiei esker. Londresen, kasu, aldarrikapen sinple eta koloretsua egin zuen London Basque Society elkarteak, Ingalaterrako hiriburuko Trafalgar Square plaza famatuan, abenduaren 2an, Euskararen Eguneko bezperan.

Elkarteko kideak National Gallery museo ospetsuaren eskaileratan bildu ziren eta han, bakoitzak letra bat eskuan hartuta euskararen aldeko aldarria egin zuten: "Euskaraz bizi nahi dugu". Ondoren Covent Garden plazako "Pix" pintxo jatetxean bazkaldu zuten. Euskal etxekoek argazkiaren "Making of" eder hau jarri dute sarean:

Australian, Sydneyko Gure Txoko euskal etxeak Euskararen Eguna euskarazko egunkari bakarrari lagunduz ospatzea erabaki zuen eta Berriaren aldeko bazkaria egin zuen. Bazkari honen bitartez bildutako dirua Berriaren aldeko 'Zure ziztada behar dugu' kanpainari emango dio elkarteak. Ehun lagundik gora bildu ziren Gure Txokon, eta giroa oso ona izan zen.

Euskararen Eguna Sydney 2012 (1)

 [Sydneyko Gure Txokoko kideek 996 australiar dolar bildu zituzten Berriarentzat! (argazkia SydneyEE)]

Estatu Batuetan Boiseko euskara ikasleek abenduaren 3an, astelehenean, ospatu zuten Euskararen Eguna. Izaskun Kortazar irakasleak azaldu duenez maila desberdinetako euskara ikasleak elkartu ziren, guztira 24 ikasle.

Ikasleek euskara zergatik ikasten duten azaldu zuten --"euskara ikasten dut euskal kulturaren arima delako", esan zuen batek-- eta euskara ikasteko erronkei buruz ere aritu ziren solasean. Klasean jolasak egin zituzten euskaraz eta ondoren Lekuona jatetxean pintxo jana egin eta klasean ikasitako gabon kantak abestu zituzten.

Euskararen Eguna Boise 2012 (1)

 [Jolasak Boiseko euskara ikasleen Euskararen Eguneko Festan (argazkia IKortazar)]

 Euskararen Eguna Boise 2012 (2)

 [Lekuona jatetxea Gabon kantak abestu zituzten Boiseko euskara ikasleek (argazkia IKortazar)]

Bordelen, Frantzian, Euskaldunon Biltzarra Euskal Etxeak Kirmen Uribe idazlea izan zuen gonbidatu nagusi gisa Euskararen Egunean. Ondarroarrak "Bilbao - New York - Bilbao" eleberria aurkeztu zuen Bordeleko Cervantes Institutuaren egoitzan eta ondoren Euskal Etxean Kimuak programako euskal laburmetraien emanaldia egin zen, Euskadiko Filmategiko Esther Caberok aurkeztuta.

Elkarteko presidente David Mugicak EuskalKultura.com-i azaldu dionez Uriberen aurkezpenera 50 bat pertsona bildu ziren eta "oso momentu hunkigarria, interesgarria izan zen". Ondotik ikusi ahal izan ziren laburmetraiak, aldiz, "hunkigarriak dira benetan, batzuetan irringarri, bestetan negargarri, hunkitzen zaituzte hunkitzen. Proiekzioaren ondoren, zintzur-bustitze jakina! Bai antolatzaileak bai etorriak zitzaizkigunak denak pozik zeuden!".

Euskararen Eguna 2012 Bordele

[Euskararen Eguna ospatzen Bordeleko Euskal Etxean Juan Pedro de Bazterretxea (Bordeleko Cervantes Institutua), Esther Cabero (Kimuak-Euskadiko Filmategia) eta Kirmen Uribe idazlea (argazkia BordeleEE)]

Amaitzeko, Uruguaien Montevideoko Euskal Erria euskal etxeak kalera atera zituen bazkideak, Euskararen Egunaren berri emateko hirikideei. Gauen, "Gazta Zati Bat" dokumentalaren emanaldia egin zen elkartearen egoitzan. Euskal Erriakoek sarean jarri dute eguneko bideo hau:

harpidetza

ZUAZU Xabier — 2012/12/18 16:51
Barkatu, ez dakit nola edo hala, ezin dut zure berriak, ber-ber-piztuko. Estuvimos suscritos hace unos años, a la edición en castellano, de repente la perdimos, costo Dios y ayuda, recuperarla. Nuevamente hace dos o tres meses, perdida de nuevo. Hemos telefoneado hace unos día y nos habeis enviado un formulario que no hay modo, primero entenderlo (ez da euskerarik kulpa), luego tratar de reenviarlo, y el resultado, se ve que nulo. Tengo un otro correo, iturrittu@euskaltel.net, a ver si por ése. Por favor, un sistema para niños y milicos sin graduación. Insistiré telefonicamente. Aunitz ezker

Erantzuna Xabierri

EuskalKultura.com — 2012/12/23 13:30
Kaixo Xabier, zuzenean ere idatzi dizugunez, harpidetu zaitugu. Barkatu eragozpenak. Dena den, hona harpidetzeko lekuak:

Euskaraz
www.euskalkultura.com/harpidetza

Para suscribirte en castellano:
www.euskalkultura.com/suscripcion

In English (weekly):
www.euskalkultura.com/subscription


Komentarioa gehitu

Komentario bat gehitu zenezake formularioa betata

(Beharrezkoa)
Esaiguzu zure izena
(Beharrezkoa)
(Derrigorrezkoa)
(Derrigorrezkoa)
(Beharrezkoa)
Erantzun galderari aurrera jarraitzeko:

Zenbat dira hiru gehi bi? (idatzi zenbakiekin)


bisita