Arrasate Irratia

FMko 107.7an

Arrasate Irratia-k FMko 107.7an emititzen du, euskara hutsean. Bereziki herriko eta ibarreko kontuetan espezializatutako irratia da, nahiz eta mundu zabaleko gertakariak ere jasotzen dituen, beti ere, herriko ikuspuntua galdu gabe.

Esan bezala, Arrasate Irratia herri irratia izanik, Udal irratien legeak Arrasaten bakarrik emititzea baimentzen du, baina GOIENA enpresaren adar bat izanda, Goiena Telebista -ren seinaleaz baliatuta, irratia entzuteko beste aukera bat ere badago telebistaren bitartez; horrela, bada, Goiena Telebista-k zuzeneko saiorik ez duen orduetan Arrasate Irratia Debagoieneko txoko guztietara heltzen da Goiena Telebista-ren bitartez.

Berrikuntzekin hasiko du 2011 urte berria Arrasate Irratiak. Nobedadeen artean, ordutegi aldaketa dago. Astelehenetik aurrera, urtarrilak 10, goizeko 10:30etik 11:30era izango da zuzenean Igo autobusera irratsaioa.

Beti bezala, albisteak izango dira irratsaioaren ardatza. Programazio berrian, 15 minutuko albistegia egongo da lehenengo eta magazina gero. Magazinaren barruan sartuko ditu eguneko beste albiste batzuk, elkarrizketa edo erreportaia moduan. Horrez gain, baina, betiko tarte finkoak ere izango ditu Igo autobusera berrituak, hala nola: gazte bulegoko eta sexologia zerbitzuetako azken berriak, teknologia berrietan gertatu diren nobedadeak eta entzuleen artean banatzeko opariak.

Albistegia

Ordutegiaz gain, bada, edukietan ere egongo dira aldaketak, horien artean, goizean zehar 107.7ko albistegia hainbat alditan eskainiko dela. Helburua da Arrasateren berri jasotzea lehenengo eta gero nazio mailakoak. Hasi gertu-gertuko informazioarekin, Debagoienekoarekin batera, eta albiste orokorrekin bat egitea gero.

Hori horrela, 10:30eko albistegia, entzun ahal izango da ere: 11:45ean eta 12:45ean. Arratsaldetan, berriz, goizeko irratsaio osoa entzun ahal izango da: 14:00etan, 17:00etan, 19:00etan eta 22:00etan.

Musika tartea

Orain arte bezala, musikak garrantzia izaten jarraituko du 107.7an. Horrela, zuzeneko saioaren aurretik eta ondoren, musika entzun ahal izango da Arrasate Irratian, euskal musikaren aldeko apostua eginez. Arratsaldeko saioak lotzeko soka musika izango da.

Egubakoitzetan zozketak

Entzuleen artean zozketatzeko opariak izango ditu Arrasate Irratiko autobusak aurten ere. Orain arte moduan, egubakoitzetako saioaren amaieran izango da zozketa.

Zozketan parte hartzeko bideak, betikoak dira:

irratia@goiena.com
943 25 05 05