EIZIE Elkartea
Nortzuk gara?
EIZIEk itzultzaile, intrerprete eta zuzentzaile profesionalak biltzen ditu, eskarmentu handikoak zein hasi berriak.
Itzulpengintzak batzen gaitu, euskaratik edota euskarara egiten dugun itzulpen, interpretazio zein zuzenketa lanak, edonon bizi garela ere.
Administrazioko itzultzaileak, interpreteak eta testu zuzentzaileak biltzen gara EIZIEn; literatur itzultzaileak, ikus-entzunezkoen itzultzaileak, zinpeko itzultzaileak… bizibidez batzuk, bizioz beste batzuk; beren kasa batzuk, soldatapean beste batzuk…
Zer egiten dugu?
Helburu jakin batzuk lortzeko sortu zen EIZIE 1987. urtean, eta horiexen inguruan lan egiten jarraitzen du:
• itzulpengintzaren informazioa bildu eta zabaldu,
• itzultzaileek itzultzaileentzat sorturiko Senez aldizkaria argitaratu,
• gure aurrekoen lan sarritan eskerga aitortu, berreskuratu eta zabaldu,
• itzultzaileen prestakuntzarako saioak antolatu edo sustatu,
• literatura unibertsalaren ondarea euskarari ekartzeko bilduma bat sortu eta kudeatu,
• profesionalen lan-baldintzei kasu egin,
• itzultzailearen ikusgaitasuna landu
• itzulpengintza sustatu
• itzulpengintzak euskarari egiten dion ekarpenaz jabetzeko saioak antolatu,
• …
Asmo horiek betetzeko xedez, hainbat jarduera antolatzen ditugu urtero, ikastaroak, jardunaldiak, biltzarrak eta abar.
Horretaz gain, zenbait argitalpen ere plazaratzen ditugu, SENEZ itzulpen aldizkaria, besteak beste.
Nork egiten du hori?
Zuzendaritza Batzordea da jardun horren guztiaren gidari; Batzordea bi urtez behin berritzen da.
Honako hauek dira Batzordekide 2011n:
• Bakartxo Arrizabalaga lehendakaria
• Patxi Petrirena lehendakariordea
• Jone Aldamiz-etxebarria idazkari nagusia
• Iñigo Errasti diruzaina.
Kargudunek ez ezik, honako kide hauek ere osatzen dute Zuzendaritza Batzordea:
• Aintzane Atela
• Miren Ibarluzea
• Josemari Navascués
Bestalde, sailen edo alorren araberako arduradunek ere hartzen dute parte:
• Karlos del Olmo Senez aldizkariaren zuzendaria
• Gotzon Egia webgunearen arduraduna
• Bego Montorio ItzulBaita proiektuaren arduraduna
• Itziar Otegi, CEATL erakundean eta Asocesp sarean Elkartearen ordezkari.
Horiez gain, Elkartearen egoitzan bi bulegari aritzen dira, eta beste zenbait kidek ere kolaboratzen dute, jardueraren arabera.
Zer eskaintzen dugu?
Egiten dugun lanaren onura konpartitzea, informazio trukerako eta harremanetarako gune bat, aholkularitza, gure argitalpenak…
Bazkideentzat lan-poltsa bat eta "Barnekoa" buletina, prestakuntza saioetan lehentasuna eta prezio berezia, argitalpen ororen ale bana…
Norekin gara harremanetan?
Erakunde hauetako bazkide da EIZIE:
• Kontseilua
• Langune
• Asocesp
• CEATL
• FIT
Egoitzakide ditugun EIE, EEE eta Galtzagorri Elkarteekin ez ezik, beste hainbat erakunderekin ere jarduten dugu noizbehinka edo harreman finkoago baten bidez: Armiarma, EHU, EIMA, Eusko Jaurlaritza…
