Internet
Goiena.net
Teknologia berriak eta Internet arloan aurrerapauso handiak eman dira GOIENAn. Goiena.net -en, euskararen presentzia indartu eta bultzatzeak berebiziko garrantzia du. Eginkizun hori modu profesional eta serioan egiten dihardu GOIENAko lantaldeak.
Goiena.net 2003ko azaroan jarri zen martxan. Informazioa da webgunearen funtsa, batez ere hasieran, eta diseinua ere horretara bideratuta dago. Irisgarritasun eta erabilgarritasun kontzeptuekin egindako gunea da Goiena.net. Django plataforman eginda dago, software librean. CodeSyntax enpresak egin du webgunea.
Diseinua
Goiena.net webgunearen hasierako diseinua Goio Aranak (Goiena) eta Maite Rementeriak (Code&Syntax) landu zuten. 2004. urtean, Goiena.net-ek Portugal eta Espainiako diseinu hoberenaren saria jaso zuen.
2010a geroztik, Goiena.net berritua martxan da! Besteak beste, Goiena Telebista-n landutako eguneko albisteen laburpena eta bideoak ikus daitezke. Berrikuntzen artean, zorion-agurren edota sailkatuen atalak daude. Edonork bidali ditzake gainera!
Lantaldearen jarduna
Goiena.net-ek eguneroko funtzionamenduan aldaketa sakona ekarri du lantaldera. Kazetariek, albistea jaso ahala, lehenengo Interneteko bertsiorako lantzen dute eta gero beste euskarrietarako prestatu albistea. Informazioa inork baino lehenago sarean jartzen dute kazetariek, euskara zaindu eta modu arinean erabiliz.
Danbaka.com
Musikaren gaineko webgunea da www.danbaka.com. Bloga egiteko aukera dute Euskal Herriko musika taldeek. Bloga egin nahi duen edonork bidal dezala e-posta bat danbaka@danbaka.com helbidera.
Informazio ugari
- Debagoieneko Musika Lehiaketaren gaineko informazio guztia duzue bertan.
- Debagoieneko musika taldeen gaineko albisteak eta bideoak ere badaude. Baita Debagoienetik kanpo baina debagoiendarrei interesgarriak iruditzen zaizkien bestelako musika albisteak ere. Atari egokia hitzordu eta kontzertu ezberdinen berri izateko.
- Nahi duten musika taldeek beren bloga izateko aukera dute. Musika taldeek ez dute ezer ordainduko eta webgune horretan argazkiak, abestiak mp3 formatuan eta bideoak kargatu ahal dituzte, besteak beste.
Sustatu.com
Profesional euskaldunentzako albistegi bat da Sustatu. Ekonomia, enpresa eta kulturaren alor desberdinetan (irakaskuntza, informatika, industria, zerbitzuak...) lanean diharduten eta prestatzen ari diren gazte eta helduentzako zerbitzu bat da. Sustatu.com Goiena Komunikazio Zerbitzuak eta CodeSyntax-en esku dago. Bi enpresek kudeatzen dute.
Albisteak
Web eta e-posta bidez informazioa banatzen duen gune bat da Sustatu, eta irakurleen parte-hartzea posible egitea da bere azpiegituraren bertuteetako bat.
Weblog bat izateaz gain, boletin elektroniko bat ere bada Sustatu. Harpidetzaren bidez, e-postaz jaso daitezke albisteak, dohainik. Kasu horretan, harpidedunak ez ditu jasotzen albiste osoak, baizik titularra eta sarrera txiki bat. Ziurtatua dago Sustatu-ko buletinen bidez ez dela birusik bidaliko.
Euskaraz
Teknologia berrien garaian ere, euskararen presentzia indartu eta bultzatzeak berebiziko garrantzia du. Baina, Sustatu euskara bultzatzeko ekimen bat izateaz gain, gai profesionalei zuzendutako ekimena da; hori bai, euskaraz egina irakurle euskaldunentzat.
Komunitatea eta helburuak
Badaude euskaldunak teknologia berrietan eta Interneteko eremuan lanean, hainbat industriatan eta alor ekonomikotan. Batzuk zuzenean euskarazko produktuekin, beste asko era askotako enpresetan hizkuntzarekin zerikusirik ez duten eginkizunetan. Jende profesional prestatua, gaztea eta euskalduna, badago. Baina ez komunitate bat, baizik eta talde sakabanatu bat.
Hauek dira Sustaturen helburuak:
1-. Informazioaren sorkuntza eta hedapena.
2-. Profesional euskaldunen komunitatearen trinkotzea.
Helburu horretarako, komunitatearen partehartzea ezinbestekoa da. Sustatuko berriemaile izan daiteke irakurlea; informazio eta iritzi sortzaile bihurtu daiteke. Gainera, Sustatuko albisteak ez dira artikulu soil eta itxiak: artikuluei erantzuteko aukera du irakurleak, informazioa osatzeko, zuzentzeko, eztabaidatzeko, etab.
